Astanany túrli-tústi tulparlardyń músinderi ajarlandyra tústi (FOTOREPORTAJ)
ASTANA. QazAqparat - Astana kúnin merekeleý ýaqytynda sýly-jasyl jelekte «Astana Art Fest» alǵashqy halyqaralyq qazirgi zamanǵy óner men dızaın, sáýlet festıvali ótken.
Festıval aıaqtalǵan soń barlyq erekshe eksponattardyń ishinde túrli-tústi túske boıalǵan attar qaldy. Olar qazir beıne ertegiler eliniń saqshylaryndaı «Qazmunaıgaz» ǵımaratynyń aldyndaǵy sýburqaq alańynda tizilip tur.
Bul kompozıtsııa «United Buddy Bears» (Baddı aıýlar dostyǵy) halyqaralyq jobasyn eske salady. Esterińizde bolsa, ol túrli-tústi aıýlar elordada 2010 jyly jazda «qonaqta» bolǵan. Bul bes qurylyqta ótken, mıllıondaǵan jurtshylyq tamashalaǵan biregeı kórkem kórmege aınalǵan bolatyn. Bul ıdeıa 90-shy jyldardyń aıaǵynda Germanııada bastaý alǵan. 150 elden kelgen sýretshiler Berlın sımvoly bolyp tabylatyn ań - aıýdyń músinin bezendirip boıaý úshin shaqyrtyldy. Ár eldiń rýhyn beınelegen sýretshige baılanysty ár aıýdyń ózindik ereksheligi boldy. Aıýlardyń kótergen qoldary dostyq pen optımızmdi beıneleıdi. Qatar turǵan aıýlardyń bir-birine qol berýi álemdegi adamdardyń bir-birin jaqynnan tanýǵa umtylyp, birigip baqytty ǵumyr keshýge úndegenin kórsetedi. Astana tórinen oryn alǵan attar músinderi bizdiń elimizde turatyn túrli ulttardyń naqyshyndaǵy oıýlarmen bezendirilgen. At - adaldyq pen erkindik nyshany. Adamdar dostyqqa, aralasýǵa, ózara túsinisýge kedergi keltiretin tosqaýyldardan azat bolýy tıis.
