Astanany sý basý qaýpi joq - ákimdik
ASTANA. QazAqparat - Qala bıliginiń málimdeýinshe, kóktemde Astanany sý basý qaýpi joq. Sonymen qatar Maıbalyq kóli jaǵynan da qater bolmaıdy, dep habarlaıdy QazAqparat.
Elordanyń kóktemgi qar erýi kezeńine daıyndyǵyn kórsetý úshin qala ákimdigi tilishiler qaýymyn sý rettegish bógettiń aýmaǵyna shaqyrdy.
«Maıbalyq sýy Astanaǵa eshqashan jetpeıdi, bul rette tıisti taldaý sharalary júrgizildi. Tek qana áýejaıdyń ushý jolaǵynda sý deńgeıiniń kóterilýi oryn alýy yqtımal. Búginde sý deńgeıi ótken jylǵa qaraǵanda jarty metrge tómen. Meniń oıymsha, eshqandaı problema týyndamaıdy»,-dedi ákimniń orynbasary Qosman Aıtmuhametov.
Onyń sózine qaraǵanda, eger de sý basý qaýpi týyndaǵan jaǵdaıda ushý jolaǵynyń aldy bógetpen qorshalatyn bolady. Ol úshin búginde barlyq qajetti materıaldar daıyndaldy.
«Astana mańyndaǵy sý qoımasy jaǵynan da eshqandaı qaýip joq. Jalpy, sý rettegish 300-den 400 mln. tekshe metrge deıin sý qabyldaı alady. Osy rette elordany sý baspaıtynyna kepildik beremin»,-dedi ol.
Astana sý qoımasynyń syıymdylyǵy 410 mln. tekshe metr, onyń 285 mıllıonynda sý toltyrylǵan. Al sý rettegishke 450 mln. tekshe metrge deıin sý jiberýge bolady.
Budan bólek, ákimniń orynbasary qala aýmaǵy arqyly kóktemgi tasqyn sýdy ótkizý sharalary jaıynda aıtyp berdi.
«Búginde Astana aýmaǵy arqyly qar sýyn ótkizýdiń jeti kezeńin aıqyndadyq. Osy oraıda Esildiń joǵary jaǵyn tolyqtaı zerttep shyqtyq, onda qar qory ótken kezeńderge qaraǵanda 20-30 paıyzǵa artyq. Bul rette sý qoımasyna 200-den 250 mln. tekshe metrge deıin sý kelýi múmkin, ıaǵnı osyndaı jaǵdaı qar jyldam erigen kezde oryn alýy yqtımal. Eger de kúndiz jylynyp, al túnde sý qatsa, onda 130-dan 200 mln. tekshe metrge deıingi kólemde sýmen tolyǵady. Sondyqtan da osy mólsherdi qabyldaý aıasynda sý qoımasyn bosatý úshin Esil ózeni arqyly sý rettegishke deıin sekýndyna 10 tekshe metr sýdy ótkizý jumystaryn bastadyq (...) Negizi, sýdyń eń úlken kólemi 2015 jyly bolǵan edi. Ol kezde 190 mln. tekshe metr qabyldandy. Biz ony qala aýmaǵy arqyly esh qıyndyqsyz ótkizdik,-dep túsindirdi ol.
Ákimdik málimetinshe, qys bastalǵaly elordadan 5 mln. 100 myń tekshe metr qar shyǵaryldy. Kóktemgi sý tasqynyna qarsy sharalarǵa 1 mlrd. 400 mln. teńge bólingen eken. Kún saıyn qaladan syrtqa qaraı 730 júk kóligi qar tasymaldap jatyr. Sonymen qatar erigen qar sýyna arnalǵan tıisti tehnıka da qajetti kólemde jasaqtaldy.
