Astanany sý basty: «Elorda eco system» dırektory qyzmetinen ketti

ASTANA. QazAqparat – «Elorda eco system» dırektory qyzmetinen bosatyldy. Bul týraly qala ákimdiginen málim etti, dep habarlaıdy QazAqparat.

Qalanyń nóser sýyn qabyldaıtyn káriz júıesiniń durys jumys istemeýi jáne saldarynan keıbir ýchaskelerdi sý basýǵa jol berilgeni úshin «Elorda eco system» dırektory Tımýr Shodanov qyzmetinen bosatyldy. Otyn-energetıka kesheni jáne kommýnaldyq sharýashylyq basqarmasy men «Elorda eco system» aldyna jerústi aǵyn sýyn burýdy qamtamasyz etý úshin tıisti is-sharalar júrgizý mindeti qoıyldy, Atap aıtqanda, bular: kollektorlar men jańbyr sýyn qabyldaǵyshtardy tazartý, qubyrlardy býlaý, nóserli káriz jelisiniń qýatyn ulǵaıtý jáne taǵy basqalary», - delingen ákimdik málimetinde.

Ákimdik aqparatyna sáıkes, 2023 jyly jerústi aǵyn sýyn burý úshin nóser sýyn qabyldaıtyn 2,5 km magıstraldy jeli salý josparlanyp otyr. Osyǵan deıin 200-den astam problemaly ýchaskede sý basý máselesi sheshilgen.

Eske salaıyq, keshe Astanada jańbyr saldarynan keıbir kóshelerdi sý basqan bolatyn. Saldardy joıýǵa 100-den astam tehnıka jumyldyryldy.