Astanany «Sergek» kameralarymen qamtý 1 maýsymǵa deıin aıaqtalady
ASTANA. QazAqparat - Búgin Astana ákimi Áset Isekeshev, Premer-Mınıstrdiń orynbasary Asqar Jumaǵalıev, Bas prokýrordyń orynbasary Marat Ahmetjanov Sıtýatsııalyq ortalyqqa baryp, «Sergek» jobasyn iske asyrý máselesin talqylady, dep habarlaıdy QazAqparat qala ákimdiginiń saıtyna silteme jasap.
Asqar Jumaǵalıevke «Sergek» foto-beıne tirkeý júıesiniń barlyq múmkindigin tanystyryp, «Qamqor» aıyppul tóleý júıesi men ákimshilik quqyq buzýshylyqtyń biregeı tirkeýin kórsetip shyqty.
Áset Isekeshev «Sergek» kamerasyn ornatý jáne «nóldik tózimdilik» qaǵıdasyn iske asyrý arqasynda, orta eseppen qylmysty - 30 paıyzǵa, al jol-kólik oqıǵalaryn 18 paıyzǵa tómendetý múmkin bolǵanyn aıtty.
Tanystyrý barysynda vıtse-premer Asqar Jumaǵalıev ІІM-ge Bas prokýratýra men ІІM aqparattyq júıesin biriktirý protsedýrasyn jedeldetýdi tapsyrdy.
Búginde kamera ornatýdyń birinshi kezeńi aıaqtaldy. Qalada 6 365 kamera biriktirilip, ornatyldy. Búkil qalany «Sergek» kamerasymen qamtý 2018 jyldyń 1 maýsymyna deıin aıaqtalmaq.
Ári qaraı delegatsııa «Astana LRT» keńsesiniń jumysymen tanysty. Basqarma tóraǵasy Bekmyrza Igenberdınov qaladaǵy ıntellektýaldy transport júıesin ıaǵnı baǵdarlamalyq-apparattyq keshen kórsetip shyqty Ol baǵdarshamdar men beınebaqylaý júıesin ortalyqtan basqarýǵa múmkindik beredi. Mamandar ITS jobasy sheńberinde aıaldamalarǵa jolaýshylarǵa avtobýstyń kelý ýaqyty týraly aqparattandyryp turatyn tablo ornatylǵanyn túsindirdi. Tabloǵa qajettilik týyndaǵan jaǵdaıda TJ men basqa da aldyn ala belgisiz jaǵdaılar týraly qosymsha aqparattardy ornalastyrýǵa bolatynyn aıtty.
Dıspetcher ortalyǵyna kelgen qonaqtar táýlik boıy jedel rejimde júrgizilip jatqan ortalyqtandyrylǵan basqarmanyń tasymaldaý protsesimen de tanysty. Arnaıy ekranda qalanyń kartasy jáne qozǵalys kestesin baqylaıtyn ındıkatorly barlyq avtobýstyń jaǵdaıy kórsetilgen. Qyzyl - bul ozyp ketý, sary - qalyp ketý, jasyl - kesteni saqtaý. Atalmysh kartaǵa úzilis bolǵan jaǵdaıda, shema ózgergen kezde, TJ barysynda avtobýstardyń statýsy ózgergeni kórsetiledi.
Asqar Jumaǵalıev barlyq fýnktsııalar qalalyqtardyń ómirin yńǵaıly ári aıtarlyqtaı jaqsarta túsetinin aıtty.
«Biz búgin jobanyń daıyn ekenin kórdik, durys jumys jasalyp jatyr, Ákimdik turǵyndardan túsken shaǵymdar men ótinishterge jedel áreket bildirip nátıje shyǵarýda. Bizge endi taǵy bir mańyzdy jumysty qolǵa alý qaldy - barlyq aqparat qoljetimdi bolatyn mobıldi qosymshany sońyna deıin aıaqtaý. Óıtkeni, engizilgen tehnologııa biz ben sizdiń qaýipsizdigimiz ben jaılylyǵymyzdy qamtamasyz etedi, demek qalalyqtar úshin oǵan qoljetimdilik barynsha qarapaıym bolýy kerek», - dedi vıtse-premer.
Búginde jolaýshylar avtobýsyn 500 myńnan astam turǵyndar qoldanady.
Nysanǵa kelgennen keıingi qorytyndy boıynsha barlyq jaýapty qyzmetke sáıkes tapsyrmalar berildi.
