Astanany odan ári jaıly etý úshin jumyla eńbek etemiz – Jeńis Qasymbek

ASTANA. QazAqparat – Astana ákimi retinde jumysyn bastaǵan Jeńis Qasymbek búgin Facebook áleýmettik jelisindegi paraqshasynda post jarııalap, bolashaq josparlary týraly aıtty, dep habarlaıdy QazAqparat.

«Qurmetti astanalyqtar!

Sizdermen jumys isteý – men úshin úlken mártebe ári úlken jaýapkershilik. Elordamyzdy ary qaraı birlese damytatyn bolamyz. Astana – qashanda ózine eriksiz baýrap alatyn, tartymdy qala bolyp keledi. Sol sııaqty Astananyń ózine tán sulýlyǵy men ózindik erekshe energııasy bar. Qalamyzdy odan ári jaıly da qolaıly etý úshin judyryqtaı jumylyp eńbek etemiz»,-dep jazdy elorda basshysy.

Onyń aıtýynsha, qazirgi ýaqytta dúnıejúzindegi megapolısterdiń aldynda jańa jahandyq syn-qaterler men mindetter tur. Astana da solardyń qatarynda. Ekonomıkalyq kórsetkishter, kásipkerlikti damytý, ınfraqurylym, qoljetimdi áleýmettik qyzmetter – óz jumysymyzda qala ómiri úshin mańyzy zor barlyq salany qamtımyz.

Qala turǵyndarynyń jaıly ómir súrýi úshin qoljetimdi áleýmettik turǵyn úıler, mektepter, balabaqshalar, medıtsınalyq nysandar jáne t.b. salýdy ári qaraı da jalǵastyramyz. Qala turǵyndarynyń sany, qurylys kólemi jyl saıyn ósip kele jatqanyn eskerip, jylý, sý jáne elektrmen jabdyqtaý nysandarynyń qýatyn ulǵaıtý boıynsha jumys isteıtin bolamyz.

«Áleýmettik jeli – tıimdi baılanys quraly. Biz úshin sizderdiń pikirlerińiz mańyzdy. Elordamyzdy ary qaraı damytý boıynsha sizderden usynystar men ıdeıalar kútemiz»,-dep jazdy Jeńis Qasymbek.

QazAqparat osyǵan deıin elimizdiń bas qalasyna jańa ákim taǵaıyndalǵanyn jazǵan bolatyn.

Sondaı-aq Jeńis Qasymbek Qaraǵandy oblysyn basqarǵan jyldar ózi úshin ómir mektebi bolǵanyn aıtty.