Astanany nóser sýynan qorǵaý qalaı iske asyrylmaq
ASTANA. QazAqparat - Astana bıligi nóser sýy aǵatyn káriz júıeleriniń jumysyn jaqsartý maqsatynda jeliler men tazalaý qondyrǵylaryn jóndeý, qaıta qurý fýnktsııalaryn biryńǵaı kompanııa - «Astana Tazalyq» JShS-ǵa berýdi kózdep otyr. Bul týraly elorda ákimdiginiń resmı saıtyna málim etildi, dep habarlaıdy QazAqparat.
Atap ótilgendeı, bul tehnıkalyq sheshim bolǵandyqtan, jańa kompanııany qurý qarastyrylmaıdy.
Eske sala keteıik, 22 tamyz kúni Úkimet otyrysynda Astananyń káriz júıesiniń jumysyn jaqsartý máselesi talqylanǵan bolatyn. Otyrysta «Astana Tazalyq» jaýapkershiligi shekteýli seriktestigin jekeshelendirý baǵdarlamasynan shyǵaryp, oǵan sý aǵatyn naýalarǵa qyzmet kórsetý ýákilettikterin berý usynyldy. Másele «Astana Tazalyq» JShS-ǵa qosymsha fýnktsııalardy berýde bolyp otyr.
Aıta ketý kerek, búgingi tańda káriz júıesine qyzmet kórsetý fýnktsııalary aýdandar ákimdikterine júktelgen jáne onymen jekemenshik kompanııalar aınalysady. Sarapshylardyń baǵalaýy boıynsha, osy fýnktsııalardyń barlyǵyn bir uıymǵa berý tehnıkalyq jaǵynan jumystardy jeńildetedi. Mundaı tájirıbe Parıj, Berlın, Varshava, Nıý-Iork, Máskeý sııaqty iri qalalarda qoldanylady.
Ákimdiktiń derekterine súıensek, qazirgi kezde qalanyń ıeliginde 300 km qubyr, baqylaý júrgizetin jáne jańbyr sýyn qabyldaıtyn 20 myńǵa jýyq qudyq, 13 tazalaý qondyrǵylary, 3 jınaý toǵany, 56 drenaj jáne sý aıdaıtyn nasos stansylary, 45 kılometrlik aryq júıesi bar. Sońǵy eki jylda tazalaý qondyrǵylarynyń sany 5-ten 12-ge jetip, al sý jınalatyn alań 6,3 myń gektarǵa ulǵaıǵan.
