Astanany qyzyl sý basý qaýpi joq
ASTANA. QazAqparat - Astanany qyzyl sý basý qaýpi joq. Bul týraly búgin Preobrajenka sý torabyndaǵy jaǵdaımen tanysqan QR Aýyl sharýashylyǵy mınıstrligi Sý resýrstary komıtetiniń tóraǵasy Islam Ábishev aıtty.
«Qazirgi ýaqytta osy Preobrajenka sý toraby bógetinen sekýndyna shamamen 1360 tekshe metr sý aǵyp ótýde. Bizdiń boljamymyzsha, erteń tańerteńgi saǵat 10-11-lerde onyń kólemi sekýndyna 2600-3000 tekshe metrdi quraýy múmkin. Mundaı derek óńir tarıhynda esh ýaqytta bolmaǵan. Sondyqtan, ony tótenshe jaǵdaı retinde baǵalaýǵa bolady», - dedi ol.
Onyń atap ótýinshe, respýblıkalyq bıýdjetten arnaıy qarjy bólinip, 2012-2014 jyldary aralyǵynda Nura ózeniniń Preobrajenka sý torabynyń saǵasy joǵary qaraı 20, tómen qaraı 28 shaqyrym tazartylǵan. Degenmen Nura ózeniń saǵasyna jaqyn otyrǵan eldi mekenderdi topan sý basý qaýpi bar. Qazirgi ýaqytta elimizdiń tótenshe jaǵdaılar komıtetiniń, jergilikti ákimdikterdiń ókilderi sý barýy múmkin eldi mekenderge eskertý jasady.
«Astana qalasyna qaýip joq. Tek Nura ózeniń jaǵalaýyna jaqyn qonystanǵan keıbir eldi mekenderge sý barýy múmkin», - dedi I.Ábishev.
