Astanany kóktemde sý baspaıdy - ákimniń orynbasary
ASTANA. QazAqparat - 2016 jyldyń qazanynan beri Astana qalasynda 117,6 mm jańbyr jaýǵan eken. Qalanyń kommýnaldyq qyzmeti úsh aıdan beri kúni-túni, demalyssyz qar tazalap júr. Al, qańtar aıynyń basynda 0 gradýstyq temperatýrada jaýǵan qar ezilip, kóshedegi qozǵalysty qıyndata tústi.
Tórt kúndik demalystan keıin áleýmettik jelide qaladaǵy kólik júretin, jaıaý adam júretin joldar qardan tazalanbady degen syn-pikirler kóbeıdi. Sondyqtan, qala basshylyǵy kesh aýa jýrnalısterdi ertip, qalany qalaı qardan tazalap jatqanyn kórsetti.
«Jańa jylda halyq toı toılady, al, biz jumys istedik. Tek túngi saǵat 22.00-02.00 aralyǵynda ǵana demalys boldy. Qaladaǵy úlken magıstraldi kóshelerdi qardan tazalap qoıdyq, tek endi úılerdiń arasyn, tar kóshelerdi, mektepter men emhanalardyń janyn tazalaý qaldy. Tańerteń qala turǵyndary bizdiń jumysymyzdyń nátıjesin kóredi»,-deıdi jýrnalıstermen áńgimelesken Astana qalasy ákiminiń orynbasary Qosman Aıtmuhambetov.
Buǵan deıin habarlaǵanymyzdaı, qaladan osy ýaqytqa deıin 2 mln 200 myń tekshe metr qar shyǵaryldy. Almaty aýdany boıynsha tazalanaǵan qar - Jylý elektr stantsııalarynyń janyndaǵy qar polıgonyna, Esil aýdanynda tazalanǵan qar Qosshy aýylyna qaraı, Saryarqa aýdanynan tazalanǵan qar Astana-Kókshetaý tasjolynyń boıyndaǵy polıgonǵa shyǵarylady eken.
«Kóktemde qalany qardyń sýy basady degen qaýip joq. Birinshiden, qardyń bári arnaıy polıgonǵa tógiledi. Ekinshiden, qalanyń kóshelerin qardan tazalap bolǵan soń, saıabaqtar men gazondardaǵy qardy da ábden tazalaımyz»,-dep sendirdi ákimniń orynbasary.
