Astanany qalyń qar basty
ASTANA. QazAqparat - Elordada qardyń qalyń túsýine jáne kóktaıǵaqqa baılanysty qalalyq barlyq qyzmetter kúsheıtilgen jumys rejimine kóshirildi, dep habarlaıdy QazAqparat.
«25 naýryz kúni Esil aýdanynda 705 jumysshy jáne 318 arnaıy tehnıka, onyń ishinde qum shashqysh, avtogreıderler, júk tıegishter, samosvaldar, motopompalar jumyldyryldy. Saryarqa aýdanynda qar tazalaýǵa 215 arnaıy tehnıka shyqty. Bul aýdanda 455 jumysshy jumys isteýde. Al Almaty aýdanynda 584 jumysshy men qum shashqysh, avtogreıderler, júk tıegishter, samosvaldar, motopompalar sııaqty arnaıy tehnıkalar jumys istep jatyr», - dep jazdy Astana qalasy ákimdigi baspasóz qyzmetiniń jetekshisi Elvıra Júrgenbaeva Feısbýktegi paraqshasynda.
Sonymen qatar ol qala turǵyndary men qonaqtaryna qaýipsizdik sharalaryn barynsha saqtaý qajettigin eskertip ótken.
«Kólik quralyn basqarý barysynda jyldamdyq rejimi men ara qashyqtyqty saqtap, kúrt burylys jasaýdan abaı bolyńyzdar. Sonymen qatar, jaıaý júrginshiler de barynsha saqtyq tanytýlary qajet. Joldy arnaıy belgilengen jerden ǵana kesip ótý qajet. Qala joldarynda arnaıy tehnıkalardyń jumys isteýine baılanysty ýaqytsha qolaısyzdyqtar bolýy múmkin. Sondyqtan qala ishinde júrgen kezde baǵdardy aldyn ala josparlaý qajet», - dep jazady Elvıra Júrgenbaeva.
