Astanany gazdandyrýdyń ІІ kezeńine 3 mlrd teńge bólinedi

ASTANA. QazAqparat – 2024 jyly Astanany gazdandyrýdyń ІІ kezeńine 3 mlrd teńge bólinedi, dep habarlaıdy QazAqparat tilshisi.

Bul týraly Energetıka mınıstrliginiń bıýdjettik baǵdarlamasynyń jobasynda aıtylǵan.

Qujattaǵy málimetke súıensek, joǵary qysymdy gaz qubyryn tartýdyń ІІ kezegi 2024 jylǵa josparlanǵan. Osynyń arqasynda 3-9 iske qosý keshenderi salynbaq. Bul maqsatqa Energetıka mınıstrligi 3 mlrd teńge jumsamaqshy.

Al 2025 jyly qurylystyń ІІІ kezegi iske asyrylady. Bul kezeńde gaz qubyryn burý jobasy oryndalyp, 1-3 iske qosý keshenderi salynady. Bul maqsatqa bıýdjetten 3 mlrd 672 mln 951 myń teńge qarastyrylǵan.

Jalpy mınıstrlik 2024 jyly respýblıka boıynsha 176 342 adam men 25 aýyldyq eldi mekendi gazdandyrýdy josparlap otyr.