Astanany barsha álemge tanytyp, ulyqtaý bizdiń basty mindetimiz bolýy tıis - bas dızaıner S.Janbolatov
ASTANA. 21 qańtar. QazAqparat /Arman Asqarov/ - Búgin elordadaǵy Táýelsizdik saraıynda ótken «dóńgelek ústelde» Elbasy Nursultan Nazarbaevtyń Astananyń sáýlettik kelbetin qalyptastyrýdaǵy róli talqylandy.
Jıynǵa qatysqan elordanyń belgili sáýletshi-mamandary Prezıdenttiń el astanasyn Almatydan sol kezdegi Aqmola qalasyna aýystyrý týraly sheshiminiń tarıhı mańyzdylyǵyn erekshe atap ótip, Táýelsizdik alǵannan keıingi jyldary bul sheshimniń barlyq qazaqstandyq qoǵamnyń saıası-ekonomıkalyq damýyna qalaısha áser etkendigi jaıynda sóz qozǵady.
Sondaı-aq «dóńgelek ústelde» Elbasy Nursultan Nazarbaevtyń elimizdiń jańa ordasy - Astana qalasynyń qurylysynda eýropalyq jáne shyǵystyq sáýlet óneriniń úndestigin taba bilý sheberligine joǵary baǵa berildi. «Astana Eýropa men Azııanyń ortalyǵy bolýy tıis. Qalanyń sáýlet-qurylysynyń negizgi ıdeıasy da osynda. Sondyqtan barlyǵyn bir shańyraqtyń astyna jınap, osy beıbitshilik pen birlik arqyly Astanany barsha álemge tanytyp, ulyqtaý bizdiń basty mindetimiz bolýy tıis»,- deıdi Astana qalasynyń bas dızaıneri Saǵyndyq Janbolatov.
