Astanany álemniń úzdik qalalarynyń birine aınaldyrý qajet - K.Másimov
ASTANA. QazAqparat - Astanany álemniń úzdik qalalarynyń birine aınaldyrý qajet. Bul týraly búgin «Smart Astana - 2014» halyqaralyq konferentsııasynda QR Premer-Mınıstri Kárim Másimov aıtty.
«Jalpy, álemde qalalardyń damý máselesi qazirgi ýaqytta basty nazarda bolyp tur. Taıaýda mynadaı bir pikirdi oqydym. 19 ǵasyr bul ımperııa ǵasyry boldy. Ol kezeńde ımperııa búkil ǵalamshardyń damý bolashaǵyn aıqyndady. 20 ǵasyr - bul ulttyq memleket ǵasyry. Ol ýaqytta ulttyq memlekettiń damýy mańyzdy edi. Al 21 ǵasyr - bul qalalar dáýiri», - dedi Úkimet basshysy.
QR Premer-Mınıstriniń atap ótýinshe, qazirgi ýaqytta álem qalalary bir-birimen tartysqa túsýde. Olar bir-birimen kapıtal, halyq tartýda básekeles bolyp otyr.
«Bizdiń Memleket basshymyz óte qıyn kezeńde ońtústik qala Almatydan elordany elimizdiń ortalyǵy Astana qalasyna kóshirý týraly sheshim qabyldady. Bul qalanyń alǵashqy meri qyzmetine Ádilbek Jaqsybekov taǵaıyndalǵan bolatyn. Taıaýda ǵana Elbasy ony taǵy da osy qalanyń ákimi qyzmetine taǵaıyndaý týraly sheshim qabyldady»,- dedi K.Másimov.
Sonymen qatar ol óz sózinde qazirgi ýaqytta Astananyń óz damýyndaǵy kelesi mańyzdy qadamǵa ilgerileýine biregeı múmkindigi týyp otyrǵanyn basa aıtty.
