Astanany 100 paıyz jańa avtobýspen qamtamasyz etetin merzim jarııa etildi
ASTANA. QazAqparat - Astanada qoǵamdyq kólikti turǵyndardyń 33 paıyzy ǵana paıdalanady. Búgin elordada «Astana qalasynyń kólik kesheniniń damý úrdisi» atty konferentsııada qala ákimi Áset Isekeshev osylaı málim etti.
«Qazirgi kezde Astanada turǵyndardyń tek úshten bir bóligi, ıaǵnı 33 paıyzy ǵana qoǵamdyq kólikti paıdalanady. Kún saıyn qalada qoǵamdyq kólikpen 875 myń sapar jasalady. Sonymen qatar parkti barynsha jańǵyrtýdy kózdep otyrmyz. Búginde qoǵamdyq kólik parki 1 140 avtobýsqa jetip otyr, onyń ishinde úshten bir bóligi qazirgi zamanǵy «IVECO» avtobýstarymen qamtylǵan. Osy rette parkti jańartý 35 paıyzǵa jetti. Atalǵan kórsetkishti 2017 jyldyń sońyna qaraı 60 paıyzǵa deıin jetkizý josparda bar. Al aldaǵy 5 jylda barlyq avtobýs parkin tolyqtaı jańartýdy kózdep otyrmyz», - dedi qala ákimi.
Budan buryn habarlanǵandaı, Áset Isekeshev jol jelisin damytý men qaıta jańǵyrtý jumystary aıasynda basymdyq jaıaý júrginshilerge, velosıpedshilerge jáne qoǵamdyq kólikterge beriletinin, tek sodan keıingi orynda avtokólikter bolatynyn qadap aıtty.
«Bul qadamdar álemdik trendterge sáıkes keledi. Árıne, bul sharalar avtomobılmen júretin qalalyqtardyń narazylyǵyn týdyratyny belgili, alaıda kóliktik keshen qoǵamdyq ıgilik retinde joǵaryda atalǵan basymdyqtardy eskerýi tıis», - dedi Á. Isekeshev.
