Astananyń jasyl patrýlderi: 100-den astam jas ekologııalyq tazalyqqa shyqty
ASTANA. KAZINFORM – Astananyń Baıqońyr aýdanynda 100-den astam «Jasyl el» jaýyngeri «Taza sársenbi» ekologııalyq aktsııasyna qatysty. Bul týraly Astana ákimdiginiń baspasóz qyzmeti habarlady.
«Taza sársenbi» aktsııasynyń maqsaty — qalanyń ekologııalyq jaǵdaıyn jaqsartý, tazalyqty saqtaý, ár aýlada tártip pen tazalyqqa sanaly ári jaýapty kózqaras qalyptastyrý.
Shara Astana qalasynyń Jastar saıasaty máseleleri basqarmasy, Baıqońyr aýdany ákimdigi jáne «Respýblıkalyq stýdenttik qurylys jáne jastar jasaqtary qozǵalysy» qoǵamdyq qorynyń qoldaýymen «Taza Qazaqstan» jalpyulttyq bastamasy aıasynda uıymdastyryldy.
— Sharaǵa 100-den astam «Jasyl el» jaýyngeri qatysty. Olar qoqys jınap, kóshetterge kútim jasap, aǵashtardy sýarýmen aınalysty. Astanada ekologııalyq aktsııalar turaqty túrde ótkiziledi: «Taza beısenbi», «Taza juma» jáne «Taza senbi». Osy bastamalar aıasynda jaýyngerler demalys kúnderin qosa alǵanda, kún saıyn saıabaqtar men skverlerdi qoqystan tazartyp keledi, — dedi Astana qalasy Jastar saıasaty basqarmasy bóliminiń mamany Erlan Aıdar.
«Jasyl el» eńbek jasaqtarynyń XXI maýsymy aıasynda elorda boıynsha 5200-den astam jas jumyspen qamtylady. Olar qurylys nysandarynda, qala mańyndaǵy jasyl beldeýde, áleýmettik nysandar men bilim berý mekemeleriniń aýmaǵynda, sondaı-aq qalalyq saıabaqtar men kógaldandyrý jumystaryna tartylady.
Baǵdarlamaǵa 14 pen 35 jas aralyǵyndaǵy jastar qatysa alady. Jasaq jaýyngerleri mamyr men tamyz aralyǵynda 4 aı jumys isteýge quqyly. Olarǵa arnaıy kıim úlgisi men 65 myń teńge kóleminde jalaqy beriledi. Erekshe nazar áleýmettik osal sanattaǵy jastarǵa aýdarylady. Kámeletke tolmaǵandar Eńbek kodeksine sáıkes, densaýlyǵyna zııan keltirmeıtindeı, kúnine 4 saǵattan, aptasyna 5 kún jumys isteı alady.
Jasaq quramyna qosylǵysy keletin oqýshylar óz mektepterindegi áleýmettik pedagogterge júgine alady. Qaladaǵy 120-dan astam mektepte qatysýshylardy tirkeý júrip jatyr.
— Saıabaqtar men skverlerde jumys isteýdi qalaıtyndar «Jasyl el» qalalyq shtabyna ótinim bere alady — qujattar ár aıdyń 25-kúni bastalyp qabyldanady. Artyqshylyq kópbalaly jáne áleýmettik osal otbasylardan shyqqan balalarǵa beriledi. Mindetti túrde rastaıtyn qujattar men jeke nıet bolýy tıis, — dedi Erlan Aıdar.
Aıta ketelik Májilis depýtaty Astanada jumys kúnin saǵat 7-den bastaýdy usyndy.