Astananyń jasyl beldeýine júzdegen qyrǵaýyl jiberildi
ASTANA. KAZINFORM — Jyl saıyn elordanyń sanıtarııalyq-qorǵaý jasyl aımaǵyna shamamen 1 500 dana qyrǵaýyl ushyrylady, dep habarlady elorda ákimdiginiń resmı saıty.
Astana qalasy Qorshaǵan ortany qorǵaý jáne tabıǵatty paıdalaný basqarmasy «JARYQ AQ-JOL» JShS, «Astana ormany» JShS, «Astana vetservıs» ShJQ KMK jáne Aqmola oblysy orman jáne janýarlar dúnıesi aýmaqtyq ınspektsııasymen birlesip, elordanyń sanıtarııalyq-qorǵaý jasyl aımaǵyna 325 jetisý qyrǵaýylyn ushyrdy.
Іs-sharaǵa sonymen qatar Astana máslıhatynyń depýtattary men qoǵamdyq keńes músheleri qatysty.
— Bul qustardyń ekinshi partııasy ekenin aıta ketken jón. Birinshi partııada 850 bas qus bıylǵy sáýir aıynda ushyrylǵan bolatyn. Jyl saıyn elordanyń sanıtarııalyq-qorǵaý jasyl aımaǵyna shamamen 1 500 dana qyrǵaýyl ushyrylady. Bul qyrǵaýyldardyń mekendeý aıasyn keńeıtýge, jańa aýmaqtardy qonystandyrý arqyly jasandy orman alqabyndaǵy zııankesterge qarsy bıologııalyq kúres júrgizýge yqpal etedi. ıAǵnı qyrǵaýyldardy jasandy ormanǵa ushyrý ondaǵy zııandy jándikterdiń sanyn azaıtýǵa septigin tıgizedi, — dedi Astana qalasy Qorshaǵan ortany qorǵaý jáne tabıǵatty paıdalaný basqarmasy kógaldandyrý jáne tabıǵatty paıdalaný bóliminiń basshysy Saǵynysh Saǵyntaev.
Onyń aıtýynsha, elordanyń jasyl beldeý aımaǵyndaǵy jasyl jelek, qamys butalar, jaıylymdar jáne dándi daqyldardyń agrotsenozy qyrǵaýyldardyń tirshilik etýine qolaıly.
— Qyrǵaýyldar aıazǵa tózimdi, olarǵa erekshe kútim qajet emes, tek qysta azyqtandyrý qajet. Qyrǵaýyldardyń qoregi negizinen ósimdik, jıdekter, tamyrlar. Sonymen qatar bul qustar jándiktermen de qorektenedi. Qyrǵaýyldar elordanyń sanıtarııalyq-qorǵaý jasyl aımaǵynda ornalasqan fazanarııde ósiriledi. Qustarǵa únemi baqylaý jasalyp, qadaǵalaý júrgiziledi, — dedi Saǵynysh Saǵyntaev.
Budan buryn 27 jastaǵy túrkistandyq kelinshek qyrǵaýyl ósirýdi kásipke aınaldyrǵanyn jazǵanbyz.