Astananyń jasyl beldeýinde 50-ge jýyq elik baıqaldy
ASTANA. KAZINFORM — Elorda mańyndaǵy jasyl beldeý jabaıy janýarlardyń mekenine aınalyp keledi, dep habarlaıdy Orman sharýashylyǵy jáne janýarlar dúnıesi komıtetiniń baspasóz qyzmeti.
«Jasyl aımaq» JShS RMK basshylyǵy men mamandary «Kazavıaormanqorǵaý» RMQK ókilderimen birlesip, elordanyń jasyl beldeýine áýeden monıtorıng júrgizdi.
Áýe baqylaýyna kásiporynnyń bas dırektory, Jedel basqarý ortalyǵy men Ormandy kúzetý jáne qorǵaý bóliminiń basshylary, sondaı-aq avıatsııalyq bólimsheniń mamandary qatysty.
Monıtorıng barysynda mamandar orman ekpeleriniń jaı-kúıin baǵalap, jetýi qıyn aýmaqtardy sholyp, ormanǵa qaýip tóndirýi múmkin jaǵdaılardyń bar-joǵyn baqylap shyqty.
— Áýe baqylaýy kezindegi nazar aýdartqan jaıttardyń biri — jasyl beldeýde elikterdiń kóptep kezdesýi boldy. Ártúrli aýmaqtarda 4–5-ten toptasyp júrgen, jalpy sany shamamen 50 elik baıqaldy. Bul — Astananyń jasyl beldeýi tek adam qolymen qalyptasqan orman alqaby ǵana emes, janýarlar dúnıesine de qolaıly tirshilik ortasyna aınalyp kele jatqanyn kórsetedi, — deıdi mamandar.
Búginde elordanyń jasyl beldeýi ósimdikter men janýarlar qatar damyp kele jatqan tiri ekojúıe retinde qalyptasyp keledi.
Osyǵan deıin habarlanǵandaı, elordanyń aınalasyndaǵy jasyl beldeý aldaǵy ýaqytta úlkeıe túsedi, ol úshin bos jerlerge jańa kóshetter egiledi. Qazir alǵashqy jumystar bastaldy. Topyraqtyń sortańdyǵyn anyqtaý úshin áýeli ǵylymı synaqtar júrgiziledi, sodan soń kóshet egý bastalady. Munyń bárine shamamen bes jyldaı ýaqyt qajet. Al «Jasyl beldeý» qala klımatyna qalaı áser etip jatyr? Kazinform tilshisi taqyrypty tolyǵyraq zerttep kórdi.
