Astananyń jańa kelbetin aıqyndaıtyn dızaın-kod jasalady — Jeńis Qasymbek

ASTANA. KAZINFORM — Astanada 170 qoǵamdyq keńistik abattandyryldy, 1,1 mln-nan astam aǵash egildi. Elorda ákimi Jeńis Qasymbek qalalyq ortany abattandyrý jáne kógaldandyrý jumystaryn baıandady.

Ákimniń aıtýynsha, osy maqsatta elordanyń brendbýgi, kógaldandyrý jarǵysy, «Baqshaly qala», «Jańa kelbet», «Jaıly aýla», «Renovatsııa» sekildi baǵdarlamalyq qujattar qabyldanǵan. Olar qalalyq keńistikti damytýdyń barlyq baǵyttary boıynsha birtutas tásilderdi aıqyndaıdy.

Bıyl qalada 170 qoǵamdyq keńistik abattandyryldy, 1,1 mln-nan astam jasyl jelek otyrǵyzyldy. Bul jumys elordany kógaldandyrý tujyrymdamasyna sáıkes júrgizildi, oǵan kútimniń jańa standarttary, dendroplandar jáne aǵashtardy tsıfrlyq pasportızatsııalaý kiredi.

— Jekemenshik ınvestorlar tartý arqyly pılottyq joba aıasynda eski turǵyn úılerdi qaıta jańǵyrtý jumystary bastaldy. Bul aldaǵy jyldary ásirese eski úıleri bar aýdandarda tutas kvartaldardy jańartýǵa múmkindik beredi. Mysaly Baıqońyr aýdanynda ınvestorlarǵa renovatsııaǵa arnalǵan 21 jer ýchaskesi bólingen. Kelesi jyly osy jerde Asan qaıǵy kóshesin salýdy bastaý josparlanyp otyr, — dedi J. Qasymbek Ortalyq kommýnıkatsııalar qyzmetinde ótken brıfıngide.

Sonymen birge, Astananyń jańa kelbetin aıqyndaıtyn dızaın-kod jasalyp jatyr. Ortalyq kóshelerdiń birinshi qataryndaǵy úılerdiń
60 paıyzynyń qasbetteri standarttarǵa sáıkes keltirilip, qalanyń vızýaldy tutastyǵy qalyptasyp keledi.

— Biz jekelegen abattandyrýdan kóship, «qasbetten qasbetke» prıntsıpi boıynsha kósheler keńistigin keshendi qalyptastyrýǵa baǵyttalyp kelemiz. Munda jaıaý júrginshiler, velosıpedshiler, kólik qozǵalysy, jaryqtandyrý, navıgatsııa jáne kógaldandyrý eskeriledi. Inklıýzıvti ortany damytýǵa basymdyq berilip, barlyǵyna qoljetimdi jáne teń jaǵdaılar jasalýda. Bıyl ashylǵan Greenline býlvary jobasynyń birinshi kezeńi osy tásildiń úlgisi boldy. Joldyń ornyna jańbyr baqtary men jasandy toǵandary bar jaıaý júrginshiler aımaǵy quryldy, — dedi J. Qasymbek.

Sporttyq jaǵalaý men Atatúrik jaǵalaýyn abattandyrý aıaqtaldy, Aqbulaq kanaly arqyly jaıaý júrginshiler kópiri salynyp jatyr. LRT estakadalarynyń astyndaǵy aýmaqtar paıdaly qoǵamdyq keńistikterge aınalady.

Beıbitshilik pen kelisim parki, Aqorda aldyndaǵy alań, Syǵanaq kóshesi, Máńgilik El dańǵyly jobalary da kúndelikti paıdalanýǵa yńǵaıly keńistikter bolady.

Buǵan deıin Jeńis Qasymbek qaladaǵy medıtsınalyq nysandar tapshylyǵy qalaı sheshiletinin, qaı aýdandarda jańa emhanalar ashylatynyn aıtqan edi.