Astananyń úsh aýdanynda estrada juldyzdarynyń qatysýymen kontsert ótip jatyr
ASTANA. KAZINFORM — Astananyń barlyq 6 aýdanynda jańajyldyq merekelik kontsertter ótip jatyr. Al «Qazaq eli» monýmentiniń janyndaǵy alańda, «EXPO» aýmaǵynda jáne Qalalyq alańda elimizge tanymal estrada juldyzdary óner kórsetti.
Ónerpazdar arasynda Zarına Omarova, Erkesh Hasen, Marjan Arapbaeva, Sáken Maıǵazıev, Baýyrjan Isaev, Qazybek Quraıysh, Serik Ibragımov, Jubanysh Jeksenuly, Aqbota Kerimbekova, «Melomen», «Báıterek» toptary bar.
Sondaı-aq kórermender aldynda Jandos Aıdynuly, Berik Erjanov, Aızat Qarabekova, Sultan Ahmet, Gúlsim Myrzabekova, Qymbat Jambylbek sekildi jas oryndaýshylar óner kórsetti.
Merekelik keshte Aıaz ata men Aqshaqardyń kelýi, elimizdiń memlekettik Gımnin oryndaý da josparlanǵan jáne el Prezıdentiniń jańa jyldyq quttyqtaýy kórsetiledi. Tún aýǵan soń kontserttik baǵdarlama merekelik mýzykamen jalǵasady.
Kontsertten bólek, muz aıdyndary, taǵam jármeńkesi men balalarǵa arnalǵan syrǵanaqtar jabdyqtaldy. Erekshe merekelik atmosfera qalyptastyrý úshin alańda anımatorlar jumys istep júr.
Merekelik is-shara mádenı dástúrlerdi nyǵaıtýǵa jáne Jańa jyl qarsańynda elorda turǵyndaryn biriktirýge baǵyttalǵan.
— Jańa jyldy jyl saıyn qala alańdarynda qarsy alýǵa tyrysamyz. Munda árdaıym merekelik atmosfera bar, kelgen jurtqa kóterińki kóńil kúı syılaıdy. Elorda turǵyndary men qonaqtaryna arnap osyndaı sharalardyń uıymdastyrylǵany qýantady, — dedi Astana turǵyny.
Aıta keteıik, merekelik kontsertter elordanyń barlyq aýdanyndaǵy turyn alaptarda saǵat 12.00-den beri ótti. Kontserttik baǵdarlamalar estrada juldyzdary Dosymjan Tańatarov, Gúlnur Orazymbetova, Aıgúl Imanbaeva, Zarına Omarova, Qurmash Mahanov, «Báıterek» trıosy jáne basqa da ártisterdiń qatysýymen ótti.
Sonymen birge, Prezıdent Qasym-Jomart Toqaevtyń saǵat 00:00–degi dástúrli quttyqtaýy elimizdiń barlyq aımaǵyndaǵy qoǵamdyq oryndarda ornatylǵan LED-ekrandarda kórsetiledi.
Bul halyqqa teleekrannan ǵana emes, adamdar kóp jınalatyn oryndarda da quttyqtaýdy kórýge jáne tyńdaýǵa múmkindik beredi.
Oǵan qosa, alǵash ret Jibek Joly radıosynan Prezıdenttiń jańajyldyq quttyqtaýy beriledi. Osylaısha, jańa jyldy jol ústinde qarsy alǵan qazaqstandyqtar Memleket basshysynyń quttyqtaýyn 101.4 FM jıiliginen tyńdaı alady.
Saǵat 00:00–de jańajyldyq otshashý bolady. Merekelik otshashýǵa bıýdjet qarajaty bólingen joq, demeýshilik qarajat esebinen uıymdastyrylady. Otshashý Astananyń qos jaǵalaýynda — Botanıkalyq baqta jáne «Atyraý» kópirine irgeles aýmaqta ótedi.
Buǵan deıin 2025 jyly elimizdiń mádenıet salasyndaǵy aıtýly oqıǵalar týraly jyl qorytyndysyn jarııalaǵan edik.