Astananyń tazalyǵyna jaýapty Marat Jekenovtiń hobbıi – quraq kórpe tigý
ASTANA. KAZINFORM – Elordada qarapaıym eńbek adamy erekshe ónerimen kópshilikti tańqaldyryp júr. Qalanyń tazalyǵyna 20 jylǵa jýyq ýaqyttan beri jaýapty bolyp júrgen kommýnaldyq tehnıka júrgizýshisi Marat Jekenovtiń súıikti hobbıi – quraq kórpe tigý.
Qysy qytymyr, jazy aptap Astanada ol kún saıyn tańerteń erte jumysqa kirisip, on saǵattyq aýysym boıy kóshelerdi tazalaýǵa atsalysady. Qysta qar kúrep, jazda shań-tozańdy tazalaý – onyń kúndelikti eńbegi.
– Qystygúni qar kúreımiz, jazdygúni sypyramyz, shań soramyz. Saǵat 10-da bastalsa, túngi 10-ǵa deıin jumys isteımin. Ózime unaıdy, shań sorǵanda artyma qarap, tazalyqty kórip qýanamyn. Qalanyń taza bolǵany jaqsy ǵoı, – dedi Marat Jekenov.
Júrgizýshiniń eńbek joly qurmetke laıyq. Degenmen kópshilikti tańǵaldyrǵany – onyń qolónerge degen yntasy. Ol alaman quraq tigetin sheber atanǵan. Bul ónerge alǵash jubaıy áýestenip, nemerelerine jasaý tigip berýdi maqsat etken.
Keıinnen bul qyzyǵýshylyq tutas bir otbasylyq kásipke aınaldy.
– Men osy tiginmen aınalysqanyma 5-6 jyl boldy. Kúnde meniń jumysymdy kórip, ol kisi de qyzyǵýshylyq tanytty, – deıdi jary Jeńishan Doldabekqyzy.
Marat Jekenov jubaıyna kómektesip júrip, ózi de tigin tige bastaǵan.
– Kempirime kómektesip júrip, úırenip aldym. Úıge jumystan kelgende mashına dyryldap turady. Bul kisi jumys istep jatady, men de bos otyrmaıyn dep járdemdesemin. Sodan úırenip kettim. Shańsorǵysh kólik keshke deıin dyryldap turady ǵoı, al tigin mashınasy tynyshtaý. Maǵan tynyshtyq syılaıdy, – dedi ol.
Áriptesteri bastapqyda onyń ónerine tańǵalǵan. Qazir tipti tapsyrys beretinderi de bar.
– Alǵash tige bastaǵanda áriptesterim tańqaldy. «Birge jumys isteımiz, qashan úlgeresiń?» deıtin. Úıge barǵan soń bir saǵat tigin mashınasynda otyryp, demalatynmyn.
Qazir endi ózderi tapsyrys beredi, – deıdi ol.
Zeınet jasyna bir-aq jyl qalǵan eńbek adamy aldaǵy ýaqytta súıikti isin kásipke aınaldyrýdy josparlap otyr. Armany – kishigirim otbasylyq tigin tsehyn ashý.
Aıta keteıik, jaqynda qazaqstandyq sheberler quraq kórpe tigýden álemdik rekord ornatty.