Astananyń sý doby komandasy halyqaralyq týrnırde kúmis júlde ıelendi

ASTANA. KAZINFORM — Grekııanyń Volos qalasynda jasóspirimder arasynda bedeldi SPLASHTOURNAMENTS halyqaralyq sý doby týrnıri ótti, dep habarlaıdy Astana qalasy ákimdiginiń resmı saıty.

Eýropa men Azııanyń Malta, Túrkııa, Serbııa, Chernogorııa, Kıpr, Grekııa, Rýmynııa jáne basqa da elderiniń myqty klýbtary qatysqan dodada Qazaqstan namysyn elordalyq «ASTANA» sport klýby men Oral qalasynyń tárbıelenýshileri qorǵady. Olar U14 jáne U16 sanattarynda synǵa tústi.

«ASTANA 2012» (U14) komandasy toptyq kezeńde Rýmynııa, Grekııa jáne Chernogorııa sportshylaryn aıqyn basymdyqpen jeńdi. Al jartylaı fınalda Grekııanyń eń myqty komandasyn 16:9 esebimen utty.

— Osylaısha «ASTANA 2012» tarıhı kúmis júldeni ıelendi. Bul — sońǵy jyldardaǵy qazaqstandyq sý doby sportyndaǵy eń eleýli jetistikterdiń biri. Bizdiń sportshylarymyz Eýropanyń eń myqty klýbtarymen teń dárejede básekege qabiletti ekenin dáleldedi. Ata-analardy jáne «ASTANA» klýbyn osy jetistikpen quttyqtaımyz, — dedi klýb jattyqtyrýshysy Sanjar Sálimbaev.

U16 sanatynda óner kórsetken «ASTANA 2010» komandasy da jaqsy nátıje kórsetip, 8-orynǵa taban tiredi. Olar júldeli orynnan bir qadam ǵana keıin qaldy. Bul týrnır jas sportshylar úshin erekshe tájirıbe men mańyzdy beles boldy.

Eske salaıyq, sý dobynan Qazaqstan erler quramasy Azııa chempıonatynyń qola júldegeri atanǵan bolatyn.