Astananyń sport arenalary halyqaralyq kásibı qaýymdastyqtyń bir bóligine aınaldy
ASTANA. KAZINFORM – Astanadaǵy negizgi sport nysandary sporttyq jáne demalys ınfraqurylymyn basqarý salasyndaǵy halyqaralyq kásibı qaýymdastyqtyń quramyna endi, dep habarlaıdy elorda ákimdiginiń resmı saıty.
Atap aıtqanda, «Astana Arena» stadıony, «Barys Arena» muz aıdyny jáne «Alaý» muz saraıy 150-den astam eldiń sporttyq nysandardy jobalaý, paıdalaný jáne damytý salasyndaǵy mamandardyń basyn qosatyn International Association for Sports and Leisure Facilities (IAKS) halyqaralyq qaýymdastyǵynyń qyzmetine ıntegratsııalandy.
IAKS quramyna múshelik arenalardy basqarýda halyqaralyq tásilderdi engizý men qoldanýdy kózdeıdi. Negizgi basymdyqtar qatarynda buqaralyq is-sharalar kezindegi qaýipsizdikti qamtamasyz etý, navıgatsııanyń qolaılylyǵy, kelýshiler aǵynyn tıimdi uıymdastyrý, túrli formattaǵy is-sharalarǵa beıimdeletin keńistikterdi ıkemdi transformatsııalaý, sondaı-aq qoljetimdi jáne ınklıýzıvti orta qaǵıdattaryna sáıkestik bar.
Sonymen qatar kásibı qaýymdastyqqa múshe bolý halyqaralyq salalyq zertteýlerge, mamandandyrylǵan forýmdarǵa qol jetkizýge jáne álemdik deńgeıdegi iri sporttyq týrnırler, kontsertter men shoýlar ótkizetin arenalardyń operatorlarymen tájirıbe almasýǵa múmkindik beredi.
Halyqaralyq kásibı ózara is-qımyldy keńeıtý Astananyń sporttyq ınfraqurylymyn júıeli túrde damytý men halyqaralyq deńgeıdegi is-sharalardy qabyldaýǵa daıyndyǵyn arttyrýdyń mańyzdy elementi retinde qarastyrylady.
Eske salsaq, osyǵan deıin Qysqy Olımpıadaǵa Astanadan qansha sportshy qatysatyny týraly jazǵanbyz.