Astanada sol jaǵalaýdaǵy joldyń bir bóligi jabylady

ASTANA. KAZINFORM – Astana qalasynyń Kólik jáne jol-kólik ınfraqurylymyn damytý basqarmasy Almaty kóshesindegi (Saýrannan Qabanbaı batyr dańǵylyna deıin) ortasha jóndeý jumystarynyń bastalǵanyn habarlady. 

Osyǵan baılanysty 13-25 sáýir aralyǵynda atalǵan ýchaskede qozǵalys jartylaı jabylady. Bul rette kólikterdiń qozǵalysy bir jaqtan eki baǵytta da uıymdastyrylady. 

– Elorda turǵyndary men qonaqtarynan qala joldaryndaǵy keptelisterdi boldyrmaý maqsatynda óz marshrýttaryn aldyn ala josparlaýdy suraımyz. Qaýipsizdikti qamtamasyz etý jáne qolaısyzdyqty azaıtý úshin ýaqytsha jol belgileri ornatylady, - delingen habarlamada. 

Eske sala keteıik, buǵan deıin elordada LRT qurylysyna baılanysty Qaldaıaqov kóshesinde jol qozǵalysy ýaqytsha ózgeretinin habarlaǵan edik.