Astananyń sol jaǵalaýynda turǵyn úı ornyna saıabaqtar salynady
Astana qalasy «Esil» aýdanynyń ákimi Asylbek Esenbaev eseptik brıfınginde tyǵyz úılerdiń salynýy máselesin kóterip, birneshe aýmaqtyń detaldi josparlaý jobalary ózgergenin aıtty, dep habarlaıdy Kazinform.
«Qazir biz osy júıeli máseleni sheshýde belgili bir jetistikterge qol jetkizdik. Turǵyndarmen jáne sáýlet basqarmasymen birlesip, birneshe mekenjaı boıynsha detaldi josparlaý jobalary ózgertildi. Orynbor, Aqmeshit, Almaty jáne Túrkistan kósheleriniń kvadratynda kóp páterli turǵyn úı kesheniniń ornyna «Lıneınyı» parkiniń jalǵasy retinde skver qurylysy jalǵasatyn boldy. Demek «Abý-Dabı plaza» saýda ortalyǵynan Botanıkalyq baqqa deıin skver jalǵasady. Bul turǵyndardy tolǵandyrǵan suraq bolatyn», - dedi A. Esenbaev Astana Kommýnıkatsııalar qyzmetinde ótken baspasóz máslıhatynda.
Sonymen birge, Qabanbaı batyr dańǵylyndaǵy «Pokolenıe» turǵyn úı kesheniniń jer ýchaskesiniń bir bóligi mektep qurylysyna berildi.
«Kaspıan Palas» turǵyn úı kesheni mańyndaǵy Máńgilik El dańǵyly boıyndaǵy jer ýchaskesiniń detaldi josparlaý jobasyn ózgertip, keshen qurylysynyń ornyna saıabaq salýǵa ótinim berildi. Qazirgi ýaqytta sot protsesteri júrip jatyr», - dedi aýdan ákimi.
Odan bólek, «Nova Sıtı» TK aýdanyndaǵy ýchaskedegi jospar parkıng pen kólik jýý ornynan memlekettik balabaqsha qurylysyna túzetilgen.
«Esil aýdany – elordanyń eń qarqyndy damyp kele jatqan ákimshilik ortalyǵy, búkil qala turǵyndary men týrısterdi qyzyqtyratyn oryn. Biz olardyń jaılylyǵy úshin kóp kúsh jumsaımyz. Bizge turǵyndardyń bastamalary men usynystary kómektesedi», - dedi A. Esenbaev.
