«Astananyń» shabandozy «Výelta Ispanııada» alǵash ret júldege ilikti
ASTANA. KAZINFORM – XDS Astana Team komandasynyń shabandozy Alessandro Romele «Výelta Ispanııa» kópkúndiginiń 15-kezeńinde ekinshi oryn alyp, ıspandyq Grand-týrdaǵy alǵashqy júldesine qol jetkizdi, dep habarlaıdy Kazinform tilshisi.
110,2 shaqyrymǵa josparlanǵan kezeń Palma-del-Rıoda bastalyp, Kordovada márege jetti. Qatty ystyqqa baılanysty jarys uıymdastyrýshylary qashyqtyqty qysqartty.
Kezeńniń basynda 11 shabandozdan turatyn top alǵa shyqty. Keıin ol ydyrap, sheshýshi sátte bes sportshy kósh bastady. Olardy qýǵan 12 shabandoz aradaǵy alshaqtyqty qysqarta almady. Sondyqtan jeńimpaz bes kóshbasshynyń arasyndaǵy sprıntte anyqtaldy.
Nátıjesinde Alessandro Romele belgııalyq Výt van Arttan (Visma – Lease a Bike) keıin ekinshi bolyp keldi. Úshinshi oryndy Lidl – Trek komandasynyń ókili Tıbo Nys ıelendi.
Qazaqstandyq komanda sapyndaǵy ıtalııalyq shabandoz úshin bul «Výelta Ispanııadaǵy» alǵashqy júlde boldy. «Astananyń» taǵy bir ókili Henok Mýlıýbyrhan kezeńdi onynshy bolyp aıaqtady.
15 kezeńnen keıin jalpy esepte ıspanııalyq Enrık Mas (Movistar Team) kósh bastap keledi.
Máre syzyǵyn keskennen keıin Romele jarystyń alǵashqy shaqyrymdarynan-aq qıyn bolǵanyn, al joǵary qarqyndy negizinen Visma – Lease a Bike komandasynyń shabandozdary ustap turǵanyn aıtty.
– Jarys basynan-aq aýyr boldy. Visma shabandozdary jarysty baqylaýda ustaýǵa tyrysyp, óte joǵary qarqyn kórsetti. Sonyń nátıjesinde jeńis úshin kúres úzindi toptan shyqqan shabandozdar arasynda órbidi. Basqa sportshylar birinen soń biri shabýyldaı bastady. Meniń aralyq sprınttegi shabýylym jarystyń barysyn birshama ózgertti dep oılaımyn. Osydan keıin Výt alǵa umtyldy, men onyń qyr sońynan qalmaı, aldymyzda kele jatqan eki shabandozdy qýyp jettik. Osylaısha, bes adamnan turatyn top quryldy, – dedi ol.
Shabandozdyń aıtýynsha, qashyqtyqtyń sońǵy bóliginde kúres taktıkalyq sıpat alǵan.
– Ózimdi jaqsy sezindim, al tehnıkalyq kóliktegi Aleksandr Shefer sabyr saqtaýyma kóp kómektesip, Výttyń dóńgeleginen qalmaýǵa keńes berdi. Men solaı jasaýǵa tyrystym, sonymen qatar ony kóbirek jumys isteýge májbúrlegim keldi. Alaıda bul jetkiliksiz boldy. Kórsetken nátıjelerimizdiń deńgeıi óte joǵary boldy, sondyqtan búgin myqtysy jeńdi dep oılaımyn, – dep qosty Romele.
Buǵan deıin XDS Astana Team komandasynyń shabandozy Krıstıan Skaronı Italııada ótken birkúndik «Gran-prı Indýstrııa ı Artıdjanato» jarysynda ekinshi oryn alǵan edi.
Eske sala ketspek, Qazaqstan trektegi velosporttan jasóspirimder arasyndaǵy álem chempıonatynda úzdik ondyqqa endi.
Al bıylǵy Azııa oıyndarynda tasjoldaǵy velosporttan elimizdiń namysyn úsh sportshy qorǵaıdy.
