Astananyń irgesinde 1200 oryndyq eki mektep salynyp jatyr
KÓKShETAÝ. KAZINFORM – Aqmola oblysynyń Qosshy qalasy men Tselınograd aýdanynyń Qabanbaı batyr aýylynda 1200 oryndyq eki mektep salynyp jatyr.
Óńirlerge jumys babymen barǵan aımaq basshysy Marat Ahmetjanov jańa mektepterdiń qurylys jumystary barysymen tanysty. Qosshy qalasynda 1200 oqýshyǵa arnalǵan jaıly jańa mektep halyq sany kóp aýdanda qolǵa alynǵan. Qazirgi tańda qurylys jumystary aıaqtalýǵa jaqyn, mektep aýmaǵy abattandyrylyp jatyr. Sonymen birge, oblys ákimi Qabanbaı batyr aýylynda salynyp jatqan 1200 oqýshyǵa arnalǵan mekteptiń qurylysyna nazar aýdardy.
«Qazirgi kezde qurylys-montaj jumystary, ǵımaratty syrtyn qaptaý, ishki árleý jumystary, ınjenerlik jeliler salý jumystary qolǵa alynǵan. Jabdyq pen basqa da birqatar materıaldardy jetkizý boıynsha kelisimder jasaldy», – dedi Ádilhan Ábildın.
Aımaq basshysy balalarǵa sapaly bilim berýde qurylys jumystarynyń talapqa saı bolýy mańyzdy ekenine toqtaldy.
«Biz zamanaýı, tehnıkalyq jabdyqtalǵan oqý oryndaryn salýymyz kerek. Balalarymyzdyń bilim alýy úshin qolaıly jaǵdaı jasalýy tıis. Eń bastysy, qurylystyń sapaly júrgizilýin qamtamasyz etý jáne barlyq nysandardyń merziminde tapsyrylýyn baqylaý. Bilim basqarmasy jáne aýdan ákimdik basshylyǵy mektepterdi kásibı pedagogıkalyq kadrlarmen qamtamasyz etip, balalardyń damýyna qosymsha múmkindikter jasaýy qajet. Oqýshylardyń sapaly tizimin jasap, mektepter arasynda teńdeı bólińiz», – dedi Marat Ahmetjanov.
Oblys ákimi qoǵamdyq mádenı-sporttyq ortalyqqa salynyp jatqan kireberis 1 km joldyń qurylysyn da baryp kórdi.
Búginde merdiger uıym jol jamylǵysyn jabar aldyndaǵy qıyrshyq tas tóseý jumystaryn júrgizýde. Jalpy jobaǵa asfalt tóseý, jaıaý júrginshiler joly, kóshelerge jaryqtandyrý ornatý, aýmaqty abattandyrý jáne tańbalaý jumystary kiredi.
Osy rette, oblys basshysy qala ákimine nysandardyń qurylys barysyn baqylaýdy jáne qalanyń áleýmettik-ekonomıkalyq damýy boıynsha aldaǵy jumystardy jalǵastyrýdy tapsyrdy.
Aıta ketsek, budan buryn Aqmola oblysynyń Esil aýdanynda 21 turǵyn úı salynyp jatqandyǵyn jazǵan edik.
