Astananyń oń jaǵalaýyna LRT baǵytynyń qurylysy qashan bastalady
ASTANA. KAZINFORM — Astananyń oń jaǵalaýynda salynatyn jańa LRT jelisi boıynsha ınjenerlik zertteý jumystary bastaldy. Joba ýaqytyly qarjylandyrylsa, qurylysty úsh jyl ishinde aıaqtaý josparlanyp otyr. Bul týraly CTS basqarma tóraǵasy Asylbek Dúısebaev aıtty.
CTS basshysynyń sózinshe, jaqyn kúnderi geologııalyq zertteý jumystary bastalady.
— Qazir oń jaǵalaýda geologııalyq zertteý júrgizip jatyrmyz. Aldaǵy kúnderi arnaıy qondyrǵylar ornatylyp, jer qabaty zerttele bastaıdy. Zertteý nátıjeleri daıyn bolǵannan keıin eski vokzalǵa deıingi jeliniń qurylysyna kirisemiz, — dedi Asylbek Dúısebaev.
Onyń aıtýynsha, jańa LRT jelisi Syǵanaq kóshesi boıymen ótip, «Han Shatyr» mańynda Turan dańǵylyna burylady. Odan ári Kenesary kóshesine deıin jalǵasady. Keıin Qajymuqan Muńaıtpasov atyndaǵy stadıon tusynan Jeńis dańǵylyna shyǵyp, eski temirjol vokzalyna deıin barady.
Sonymen qatar CTS basshysy bolashaqta oń jaǵalaý men Qosshy baǵytyna tartylatyn barlyq LRT jelileri estakada arqyly salynatynyn aıtty.
— Buryn Qosshy baǵytyna LRT jelisin jer ústimen júrgizý josparlanǵan edi. Alaıda qazir bul aýmaqta qurylys qarqyndy júrip jatyr. Eger jelini jermen júrgizsek, kólik qozǵalysyna kedergi keltiredi. Sondyqtan qazir estakada arqyly salýdan basqa múmkindik joq, — dedi ol.
Dúısebaevtyń sózinshe, joba ýaqytyly qarjylandyrylsa, jańa jelini úsh jyl ishinde aıaqtaýǵa bolady.
Eske salaıyq, Astanadaǵy LRT jelisiniń alǵashqy kezeńi jolaýshylar úshin 16–17 mamyrda ashylady. LRT operatorynyń baǵalaýynsha, alǵashqy kezeńde táýliktik jolaýshylar legi 25 myńnan 45 myń adamǵa deıin jetýi múmkin.
Alǵashqy jeli Astana halyqaralyq áýejaıyn «Nurly jol» vokzalymen baılanystyrady. Baǵyt boıynda 18 stansa bolady. Onyń 11-i jer deńgeıinde ornalassa, 7-eýi estakada ústinde salynady.
Poıyzdardyń ortasha jyldamdyǵy saǵatyna 60 shaqyrymdy quraıdy. Al eń joǵary jyldamdyǵy saǵatyna 80 shaqyrymǵa deıin jetedi. Jolaýshylar búkil baǵytty shamamen 40 mınýtta júrip ótedi.
