Astananyń Nura aýdany turǵyndarǵa 2,5 tonna palaý daıyndady
ASTANA. KAZINFORM – Elordanyń ortalyq saıabaǵynda ekinshi kún qatarynan Naýryz merekesi toılanyp jatyr. Merekeni uıymdastyrýshy – Nura aýdanynyń ákimdigi.
Ortalyq saıabaqtaǵy kóktem merekesi halyqaralyq deńgeıde atap ótilýde. Naýryz merekesine Iran men Tájikstan elshilikteri qosyldy. Dıplomattar óz kıiz úılerinde Naýryz kóje retsepterimen bólisip, dástúrli táttilerin taratýda. Túrki jáne parsy halyqtary úshin ortaq merekege 2 kúnde 15 myńnan astam astanalyq kelgen.
Sonymen birge, jalpyhalyqtyq merekede palaý festıvali ótti. Onda Ózbekstan, Tájikstan, Ázerbaıjan aspazdary quramymen ǵana emes, pisirý ádisimen de bir-birinen erekshelenetin palaýdyń alýan túrin pisirdi. Eki kúnde astanalyqtar 2,5 tonnadan astam tájik, Samarqan, Tashkent palaýlarynan dám tatty.
Mereke qonaqtary úshin estrada juldyzdary men bı ansamblderi óner kórsetti. Mereke alleıasynda ulttyq kıimdegi batyrlar, tazy ıtter jáne halyq ánderin shyrqaıtyn dombyrashylar sherý jasady.
«Biz búgin jyl basy – Naýryzdy toılap jatyrmyz. Bıyl biz Naýryznamany jańǵyrtyp, merekeni jańa formatta atap ótemiz. Elordanyń ortalyq saıabaǵynda da uzaq ýaqyt boıy jalpyhalyqtyq is-shara ótpegen edi. Keshe merekege 7 myńnan astam adam kelip, 1 tonnadan astam palaý daıyndaldy. Búgin biz odan da kóp halyqty kútemiz. Eki kúnde munda 20 myńǵa jýyq adam keledi dep oılaımyn. Búginde munda ár túrli elderdiń aspazdary ǵana emes, Tájikstan, Iran elshilikteriniń ókilderi de bar. Óıtkeni, Naýryz – barlyq túrki halyqtarynyń merekesi jáne ol barlyq halyqtardy biriktiredi. Olar Naýryzdy qalaı toılaıtyndaryn kórsetip, merekeniń erekshelikteri týraly áńgimeleıdi», - dedi Nura aýdany ákiminiń orynbasary Álııa Ábsemetova BAQ ókilderine bergen suhbatynda.
Onyń aıtýynsha, adamdar merekeni óte jyly qabyldady, oǵan jaqsy aýa raıy da yqpal etti.
«Atalǵan is-sharany Nura aýdany ákiminiń apparaty uıymdastyrdy. Budan da basqa tórt orynda, turǵyn úı keshenderiniń aýlalarynda Naýryz meıramy toılandy. Kórshilerdiń ózderi bas qosyp, kıiz úı qoıyp, kontsert uıymdastyrdy. Bizdiń ákimdikke bıyl 1 jyl tolady jáne bul bizdiń alǵashqy Naýryzymyz», - dedi ol.
Merekeni uıymdastyrýǵa kómektesý úshin jáne oǵan halyqaralyq aýqym berý úshin ártúrli elderden qonaqtar keldi. Solardyń biri – Tájikstannan kelgen aspaz Djmoleddın Astanakýlov.
«Biz búgin Astana turǵyndary men qonaqtary úshin arnaıy 30 keli palaý daıyndadyq. Bul tájik palaýy, jaı ǵana emes, merekelik palaý dep atalady. Onyń kúndelikti palaýdan aıyrmashylyǵy bar, máselen merekelik palaýǵa arnaıy zyǵyr maıy qosylady. Mundaı palaý qazany kem degende 500 adamdy tamaqtandyra alady», - dedi aspaz.
Aıta keteıik, bıyl Naýryz meıramy 10 kún boıy atalyp ótedi. Naýryznamanyń ár kúni belgili bir taqyrypqa arnalǵan.
