Astananyń merekelik kartasy: jańa jyldyq atmosfera men attraktsıondar
ASTANA. KAZINFORM — Bıyl Astananyń jańa jylǵa daıyndyǵy jyldaǵydan erekshe. Ár aýdan turǵyndar men qala qonaqtaryna arnalǵan arnaıy alańdar men demalys oryndaryn merekelik sán-saltanatpen bezendirdi.
Kazinform aqparat agenttigi elordalyqtar men mereke qarsańynda qalaǵa kelgen qonaqtarǵa qyzyqty ýaqyt ótkizýge bolatyn eń kórnekti lokatsııalar tizimin usynady.
Qala kósheleriniń boıyna shamdarmen kómkerilgen shaǵyn sáýlet nysandary ornatylǵan. Aǵashtar da aspashamdarmen bezendirilgen.
Ortalyq saıabaqta, Ǵashyqtar parkinde, Áıteke bı kóshesindegi alleıada, «Býharest» parkinde jáne Úrker turǵyn alabynda da jańa jyldyq shyrshalardyń shamy jaǵyldy.
Al qaladaǵy eń basty shyrsha «Astana Arena» mańynda ornatyldy. Munda 25 metrlik shyrsha qar ulpasymen, sándelgen órnektermen, gırlıandalarmen jáne jańajyldyq oıynshyqtarmen bezendirilgen. Munda keler jyldyń sımvoly - jylqy beınesine de erekshe mán berilgen.
Sonymen qatar, bul jerde fýd-korttar, jańa jyl taqyrybyndaǵy fotoaımaqtar jáne «Aıaz Ata úıi» bar.
Dál osy jerde «Jańa jyl» taqyrybyndaǵy ártúrli attraktsıondardy tamashalap, kóńildi ýaqyt ótkizýge bolady.
Odan bólek ár aýdan ákimdigi qysqy demalysty uıymdastyrý úshin syrǵanaqtar jasaǵan. Ol úshin Saraıshyq aýdanyndaǵy «Qazaq eli» alańy, Baıqońyr aýdanyndaǵy K.Atatúrik atyndaǵy saıabaǵy, Saryarqa aýdanyndaǵy «Qalalyq alańda», Qabanbaı batyr dańǵyly men «Kóktal» parkinde, Esil aýdanyndaǵy EHRO mańyna barsańyz bolady.
Bıyl qysqy demalysty joǵarǵy deńgeıde uıymdastyrý úshin jaýaptylar plastmassadan jasalǵan syrǵanaqtardy da qoldanylyp jatyr.
Joǵaryda atalǵan oryndarda ashyq aspan astyndaǵy birneshe muz aıdyndary da kelýshilerge esten ketpes erekshe áser syılaýǵa daıyn.
Qaladaǵy eń ásem lokatsııalardyń biri — Qazaq eli alańy. Alańda eki muz aıdyny, eki syrǵanaq, 25 metrlik shyrsha, jaryqtandyrylǵan pannolar men shaǵyn sáýlet nysandary ornatyldy.
Alty túrli fotoaımaq, onyń ishinde «Prıanıa», «Prıanık úıshik», «Kamın», «Syılyqtar salynǵan kreslo» jáne «Santa úıshigi» qonaqtardy merekelik kóńil-kúıge bóleıdi.
Qaladaǵy barlyq aıaldamalar da jańajyldyq áshekeılermen kórkemdelip, turǵyndarǵa erekshe áser syılap tur.
Buǵan deıin Elordanyń qysqy maýsymǵa qalaı daıyndalǵany týraly jazǵan edik.