Astananyń mártebesin aıqyndaıtyn Konstıtýtsııalyq zań jobasy jarııalandy
ASTANA. KAZINFORM — «Ashyq NQA» portalynda Astananyń mártebesin aıqyndaıtyn Konstıtýtsııalyq zańnyń jobasy jarııa etildi.
Konstıtýtsııalyq zań jobasyn Ulttyq ekonomıka mınıstrligi ázirlegen. Qujatta qarapaıym turǵyndarǵa tikeleı áser etetin birneshe mańyzdy norma bar.
Birinshiden, Astanaǵa qonystaný máselesi burynǵydan qatańyraq rettelýi múmkin. Zań jobasynda máslıhattyń «astana aýmaǵynda turǵylyqty jeri jáne ýaqytsha bolatyn (turatyn) jeri boıynsha tirkeý normatıvterin bekitedi» degen quzyreti naqty kórsetilgen. Al ákimdik osy normatıvterdi ázirleıdi. Basqasha aıtsaq, elordaǵa kóship kelý men tirkelý tártibin ákimdik pen máslıhat rettep otyra alady.
Ekinshiden, jer men múlikke qatysty memlekettik ókilettikterdiń kúsheıýi yqtımal. Zań jobasy boıynsha, ákimdik «astana aýmaǵynda maqsatqa saı paıdalanylmaıtyn jer ýchaskelerin májbúrlep alyp qoıý týraly, jer ýchaskesin memleket muqtajy úshin alyp qoıýǵa baılanysty jer ýchaskesin nemese ózge de jyljymaıtyn múlikti májbúrlep ıelikten shyǵarý týraly sotqa talap-aryz bere» alady. Sonymen qatar, memleket muqtajdyǵy úshin jerdi alyp qoıý protsesin tolyq reglamentteý kózdelip otyr. Áýeli menshik ıelerine habar beriledi, naryqtyq quny esepteledi jáne ótemaqy tólenedi. Degenmen, ótemaqy tóleý nemese tólemeý, kólemin anyqtaý jónindegi túpkilikti sheshim qabyldaý quqyǵy memleket jaǵynda qalady.
Úshinshiden, turǵyn úı qoryn jańartý jáne eski úılerdi buzý tártibi naqtylana túspek. Zań jobasynda ákimdikke «apattyq dep tanylǵan kóppáterli turǵyn úılerdi buzýdy uıymdastyrý» ókilettigi berilgen. Bul norma eski jáne qaýipti úılerdi jappaı súrý protsesin jedeldetýi múmkin. Sonymen qatar, qalada biryńǵaı sáýlettik stıl engizý úshin kópqabatty úılerdi mindetti túrde jóndeý qarastyrylǵan. Eger úı osyndaı tizimge ense, jóndeý jumystary júrgizilip, onyń shyǵyndary memleket esebinen óteledi.
Jalpy alǵanda, zań jobasy Astanany júıeli túrde retteletin, josparly damıtyn qalaǵa aınaldyrýdy kózdeıdi.
Konstıtýtsııalyq zań 2026 jyldyń 1 shildesinen bastap qoldanysqa engiziledi.
Buǵan deıin Astanada jol erejesin buzǵandar kamera arqyly anyqtalyp, jaýapqa tartylǵanyn jazǵan edik.
