Astananyń kórkin arttyrǵan gúl: elordada gortenzııalar jaıqalyp tur
ASTANA. KAZINFORM — Astanada qala aýmaǵyn keshendi kógaldandyrý jumystary jalǵasyp jatyr. Búginde elordada shamamen 4,7 mln jasyl jelek ósip tur. Al «Jasyl beldeý» aýmaǵynda taǵy 14 mln-ǵa jýyq ósimdik jaıqalyp keledi, dep habarlaıdy qala ákimdiginiń resmı saıty.
Jyl saıyn Astanada shamamen 1 mıllıon jańa jasyl jelek otyrǵyzylady. Onyń ishinde 70 myńǵa jýyǵy — aǵash.
Qala jaǵdaıyna jáne jergilikti klımat erekshelikterine tózimdi iri aǵashtar men kópjyldyq butalardy otyrǵyzýǵa erekshe mán beriledi.
— Elordadaǵy kógaldandyrý jumysynyń kórkin keltirgen ósimdikterdiń biri — shashaqty gortenzııa. Bul kópjyldyq sándik buta uzaq ýaqyt gúldep, iri gúlshoǵyrlarymen erekshelenedi. Onyń gúlderiniń reńki maýsym boıy birtindep ózgerip otyrady. Shashaqty gortenzııa qysqy sýyqqa tózimdi. Sýyq aýa raıyna shydamdy bul ósimdik durys kútim jasalǵan jaǵdaıda qalalyq ortaǵa da jaqsy beıimdeledi, — deıdi ákimdiktegiler.
Astananyń qysy qatty aıazymen, boranymen, aýa raıynyń kúrt aýytqýymen jáne ósimdikterdiń ósý kezeńiniń qysqalyǵymen erekshelenedi. Soǵan qaramastan, klımatqa beıim ósimdikterdi durys tańdaý arqyly jasyl jelekti turaqty ári alýan túrli etýge múmkindik bar.
Gúlge oranǵan gortenzııalar elordanyń jasyl qoryn arttyrýǵa baǵyttalǵan aýqymdy jumystyń bir bóligine aınalyp, qoǵamdyq keńistikke kórik berip, qala kelbetine ózindik sán qosyp tur.
Osyǵan deıin Marqakólde Qyzyl kitapqa engen sırek gúlder ósetinin jazǵanbyz.
