Elordanyń kommýnaldyq qyzmetteri kúsheıtilgen rejımge kóshti
ASTANA. KAZINFORM - 21 qarasha kúni tańerteń qala kóshelerin qardan tazartýǵa 2,6 myńnan astam jol jumysshysy jáne 1,3 myńnan astam arnaıy tehnıka shyǵaryldy, dep habarlaıdy elorda ákimdiginiń resmı saıty.
Qatty jaýyn-shashyn kezinde elordanyń kommýnaldyq qyzmetteri táýlik boıy kúsheıtilgen rejımde jumys isteıdi. Birinshi kezekte qoǵamdyq kóliktiń kedergisiz ótýin qamtamasyz etý úshin negizgi magıstraldar tazartylady. Ári qaraı ortasha qozǵalys qarqyndylyǵy bar ýchaskeler - alańdar, vokzal mańyndaǵy aýmaqtar, trotýarlar qardan tazartylady.
20-synan 21 qarashaǵa qaraǵan túni polıgondarǵa 1041 reıspen 14 myń tekshe metr qar shyǵaryldy.
Qys mezgiliniń basynan beri qaladan barlyǵy 538 myń tekshe metr qar shyǵaryldy, bul 42 423 aýyr júk kólemine teń.
Elordada birneshe jabdyqtalǵan qar polıgony jumys isteıdi. Olar samosval tehnıkasynyń nómirlik belgilerin oqý júıesimen jabdyqtalǵan, munda beınebaqylaý kameralary ornatylǵan, jaryqtandyrý qosylǵan.
Elorda turǵyndary men qonaqtarynan joldarda abaı bolýdy, qaýipsizdik erejelerin saqtaýdy, daýyldy eskertý bolǵan jaǵdaıda alys saparlardan bas tartýdy suraıdy.
Tótenshe jaǵdaı týyndaǵan kezde "112" telefonyna habarlasyńyz.
