Astananyń keıbir bóliginde aqyly turaqtardyń tólemi ózgerýi múmkin
ASTANA.KAZINFORM – Elordadaǵy aqyly turaqtardyń tarıfi qaıta qaraý josparlanyp otyr. Bul týraly qala ákiminiń orynbasary Ersin Ótebaev málim etti.
Onyń aıtýynsha, qala aýmaǵynda aqyly turaqtar aımaǵy keńeıtiledi.
— Sondaı-aq, keı jerlerde baǵa saıasaty qaıta qaralyp, tarıf ósýi múmkin. Bul rette shahardyń sol jaǵalaýdaǵy halyq kóp shoǵyrlanǵan jerler qamtylmaq. Munymen qosa, áleýmettik nysandarda avtoturaqtar máselesi qaralady, ıaǵnı kólikti tegin qoıylatyn oryndar naqtylanady, - dedi E. Ótebaev Parlament palatalarynyń otyrysynan keıin tilshiler suraǵyna jaýap bere otyryp.
Onyń aıtýynsha, demalys kúnderi turaqtar aqysyz bolýy máselesi pysyqtalyp jatyr. Budan bólek, áleýmettik nysandardyń mańyndaǵy oryndar da tegin bolady.
Eske salsaq, 2025 jyldyń jeltoqsan aıynda Astana ákimdigi men «Astananyń turaq keńistigi» JShS arasynda aldyn ala kelisimshartqa qol qoıyldy.
Qujatta atalǵan kompanııa 100% úlesin jergilikti atqarýshy organǵa qaıtarymsyz negizde beretini jazylǵan.
Búgin Ersin Ótebaev elordadaǵy aqyly turaqtar ákimdiktiń menshigine tolyqqandy ótkenin aıtty.
