Astananyń keıbir aýdanynda jaıaý júrýge ýaqytsha shekteý qoıylýy múmkin

ASTANA. KAZINFORM — Astanada terrorızmge qarsy oqý-jattyǵý ótedi. Bul týraly elordalyq terrorızmge qarsy kúres jónindegi jedel shtaby habarlady.

9-qarashada saǵat 7:00 — 14:00 aralyǵynda Elordalyq terrorızmge qarsy kúres jónindegi jedel shtabymen Astana qalasy aýmaǵynda «Veterenarııa boıynsha ulttyq referenttik ortalyq» jaǵdaıynda (Abaıdyń 150 jyldyǵy kóshesi, 22/3 úı) terrorızmge qarsy josparly oqý-jattyǵý ótkizý kózdelgen.

Sharanyń maqsaty — quqyq qorǵaý jáne arnaıy qyzmet organdary kúsh-quraldarynyń terrorızm qaýipterine qarsy jedel áreket etý daıyndyǵyn tekserý.

Oqý-jattyǵý aıasynda belgili deńgeıde tyıymdar men qalanyń keıbir aýdanynda jaıaý júrý jáne kólik qozǵalystaryna ýaqytsha shekteýler engizý qarastyrylǵan.

— Osyǵan oraı, azamattardy ótip jatqan sharaǵa túsinikpen qaraýǵa, qaýipsizdik sharalaryn saqtaýǵa, memlekettik organdar qyzmetkerleriniń zańdy talaptaryn oryndaýǵa, tek resmı aqparat kózderine senýge jáne jalǵan aqparattardyń taralýyna jol bermeýge shaqyramyz, — dep eskertti vedomstvodan.

Buǵan deıin Terrorızmdi nasıhattap, dinı alaýyzdyqty qozdyrýǵa jáne adamdardy tartýǵa qatysqan 5 adam ustalǵany belgili boldy.