Astananyń qaı aýdandarynda jańa saıabaqtar ashylady
ASTANA. KAZINFORM – Elordada Greenline býlvary salynady jáne Tóle bı kóshesinen Sh. Aıtmatov kóshesine deıin «Jasyl dáliz» paıda bolady.
Bul týraly Astana ákimdigi Ýrbanıstıka ortalyǵynyń basshysy Elnar Bazyken Jibek Joly telearnasyndaǵy «Taza qala» baǵdarlamasynda aıtty.
Onyń aıtýynsha, bıyl Astanada 1 mıllıonnan astam jasyl jelek otyrǵyzý josparlanyp otyr. Elordadaǵy 180 qoǵamdyq oryn men aýla abattandyrylyp, «Nurly jol» býlvary ońtústik pen batysqa qaraı jalǵaspaq. Oǵan qosa, kópshilik asyǵa kútken LRT kósheleri de kógaldandyrylady.
− LRT kópiriniń astyndaǵy aýmaqty abattandyrý qolǵa alyndy. Mysaly Syǵanaq kóshesi Qabanbaı batyrdan Táýelsizdik dańǵylyna deıin, «Qasbetten qasbetke deıin» ustanymy boıynsha abattandyrylyp jatyr. Bul – jaıaý júrginshiler joly, velojoldar, kógaldandyrý jáne sýarý jumystary. Mundaı mysaldardyń biri – tipti LRT kópiriniń astynda úlken aǵashtar egilip jatyr. Bul ınfraqurylymdyq jobalardyń kórkin arttyra túsedi. Bul jumystar shamamen qazan-qarasha aılarynda aıaqtalady, − dedi E.Bazyken.
Sonymen birge, qaladaǵy eki iri aýdanda – Han Shatyrdan Sh. Aıtmatov kóshesine deıin, ekinshisi – «Qazaq eli» alańynan jańa vokzalǵa deıingi «Myńjyldyq» alleıasyna basymdyq beriledi. Greenline býlvary salynyp, Tóle bı kóshesinen Sh.Aıtmatov kóshesine deıin «Jasyl dáliz» paıda bolady.
Eske sala ketsek, byltyr kópshiliktiń kóńilinen shyqqan «Taza qala» telejobasy ekinshi maýsymymen qaıta oraldy. Bul joly túsirilim toby monoqalalarǵa basa nazar aýdaryp, elimizdiń túkpir-túkpirindegi ekologııalyq ahýaldy tereńirek taldamaq. Sondaı-aq elimizdiń úsh megapolısi — Astana, Almaty men Shymkent nazarǵa iligedi.
Telejoba aptasyna 2 ret – dúısenbi jáne sársenbi kúnderi saǵat 19:30-da kórermen nazaryna usynylmaq.
Sondaı-aq, elordadaǵy Ortalyq saıabaqta qaıta óńdelgen plastıkten jasalǵan alyp mysyq músini paıda boldy.