Astananyń Esil aýdanynda 40 myńnan astam jasyl jelek otyrǵyzyldy
ASTANA. KAZINFORM – Elordadaǵy Esil aýdanynda aýlalardy abattandyrý, qoǵamdyq keńistikterdi jańartý, ınfraqurylymdy qalpyna keltirý jáne kógaldandyrý jumystary jalǵasyp jatyr, dep habarlaıdy Astana ákimdiginiń resmı saıty.
Qazirgi ýaqytta Esil aýdanynda shamamen 400 aýla bar. Olardyń basym bóligi abattandyrylǵan. Byltyr 12 aýlada keshendi abattandyrý júrgizilse, bıyl «Halyq qatysatyn bıýdjet» jobasy aıasynda taǵy 5 aýmaq jańartyldy.
Turǵyndardyń iKOMEK 109 platformasy arqyly joldaǵan ótinishterine de erekshe nazar aýdarylyp otyr.
Ótken jyldyń qorytyndysy boıynsha 53 aýlada jóndeý jáne qalpyna keltirý jumystary júrgizildi. Sonyń aıasynda 103 shaǵyn sáýlet nysany aýystyrylyp, 19 fýtbol alańy jóndeldi.
Bıyl Saýran kóshesinde kóshe-jol jelisin abattandyrý jumystary atqaryldy.
– Aýdan aýmaǵynda jóndeý-qalpyna keltirý jumystary júrip jatyr. Granıt jáne mármár taqtalar, brýschatka tósemderi qalpyna keltirilip, metall konstrýktsııalar, qabyrǵalar men oryndyqtar syrlanýda. Bordıýrler ornatylyp, sylaq jumystary júrgizilýde. Sondaı-aq jaıaý júrginshilerge arnalǵan trotýarlar men qalalyq ınfraqurylymnyń ózge de elementteri jóndelip jatyr, – delingen habarlamada.
Esil aýdanyndaǵy jasyl jelekterdi kútip-ustaý jumystary kún saıyn júrgiziledi. Aýdanda 220 myńnan astam aǵash, 500 myńǵa jýyq buta, 65 myń sharshy metr gúlzar, 5 mln sharshy metr kógal jáne 117 myń metrden astam «jasyl» qorshaý bar.
Bıyl aýdan aýmaǵynda 40 myńnan astam jasyl jelek otyrǵyzyldy.
Kógaldandyrý jumystary Kereı-Jánibek handar, Uly Dala, Qabanbaı batyr jáne basqa da kóshelerdiń boıynda keshendi túrde júrgizilgen.
Sondaı-aq EXPO saıabaǵy, QTJ gúlzary, Ál-Farabı meshitiniń aýmaǵy jáne basqa da qoǵamdyq keńistikterde kógaldandyrý men abattandyrý jumystary atqaryldy.
Aýdan ákimdigi abattandyrý, kógaldandyrý, sanıtarlyq tazalyqty saqtaý jáne qalalyq ınfraqurylymdy damytý baǵytyndaǵy jumystar aldaǵy ýaqytta da jalǵasatynyn málimdedi. Negizgi maqsat – Esil aýdany turǵyndary úshin jaıly, qaýipsiz ári zamanaýı qalalyq orta qalyptastyrý.
Qazir elordanyń barlyq alty aýdanynda abattandyrý jumystary júrgizilip jatyr. Sońǵy jyldary Astanada shamamen 500 qoǵamdyq jáne aýla keńistigi abattandyrylǵan.
Aıta keteıik, Astananyń Baıqońyr aýdanynda jańa qoǵamdyq keńistik ashyldy.
