Astananyń birneshe kóshesi jóndeý jumystary úshin jabylady
ASTANA. KAZINFORM — Elordanyń Kólik basqarmasy 2026 jylǵy jol-qurylys jumystary maýsymynyń bastalǵanyn habarlady. Osyǵan baılanysty keı kóshelerdiń jekelegen ýchaskelerinde kólik qozǵalysyna ýaqytsha shekteý engiziledi.
Atap aıtqanda, 4 sáýirden 4 mamyrǵa deıin Máńgilik El dańǵyly men Syǵanaq kóshesiniń qıylysyndaǵy kólik aıryǵynda jol jabynyna ortasha jóndeý júrgiziledi. Qozǵalys ishinara shekteledi.
5 sáýirden bastap maýsym aıyna deıin E68 kóshesiniń Á. Bekturov kóshesinen Tóle bı kóshesine deıingi ýchaskesinde qurylys jumystary bastalady, avtokólik qozǵalysy tolyq jabylady.
B. Soqpaqbaev kóshesiniń Sh. Beısekova kóshesinen K. Kúmisbekov kóshesine deıingi ýchaskesinde de qurylys jumystary jalǵasady. Mundaǵy kólik qozǵalysy 5 sáýirden bastap qarasha aıyna deıin tolyq shekteledi.
«Abaıdyń 150 jyldyǵy kóshesin N. Tilendıev dańǵylynan Beıbarys Sultan kóshesine deıin salý» jobasy iske asyryla bastaıdy. Joba aıasynda Beıbarys Sultan kóshesinen Sulýkól kóshesine deıingi aralyq 5 sáýirden 10 qazanǵa deıin tolyq jabylady.
Sonymen qatar, Kenesary kóshesinde Á. Sembınov kóshesinen Saryarqa dańǵylyna deıingi ýchaskede ortasha jóndeý jumystary bastalady. Jumystar 5-20 sáýir aralyǵynda kezeń-kezeńimen júrgiziledi.
Qazirgi ýaqytta M. Tynyshbaev kóshesinde A. Baıtursynov kóshesinen J. Nájimedenov kóshesine deıingi aralyqta da jumystar júrgizilýde.
— Tolyq jabylatyn ýchaskelerde avtokólik qozǵalysy balamaly baǵyttar arqyly uıymdastyrylady. Atalǵan shekteýlerge baılanysty qala turǵyndary men qonaqtarynan joldaǵy keptelisterdi azaıtý maqsatynda qozǵalys baǵyttaryn aldyn ala josparlaýdy suraımyz. Ýaqytsha qolaısyzdyqtar úshin keshirim suraımyz jáne júrgizilip jatqan jol-qurylys jumystaryna túsinistikpen qaraýdy ótinemiz, — deıdi basqarma.
Budan bólek, jaqyn ýaqytta myna kóshelerde jóndeý jumystary josparlanǵan:
• Aqan seri kóshesi (Tilendıev dańǵylynan Qaramende bı Shaqauly kóshesine deıin);
• Alash tasjoly (69-kósheden «Astana qalasynyń aınalma jolyna» deıin);
• Jarkent kóshesi (Sh. Qudaıberdiuly kóshesinen Hantaý kóshesine deıin);
• Janarys kóshesi (Sileti kóshesinen Sh. Qudaıberdiuly kóshesine deıin);
• 489-kóshe (abattandyrý jumystary), sondaı-aq basqa da ýchaskeler.
Bul kóshelerdegi qozǵalysqa ýaqytsha shekteý engizý merzimderi týraly aqparat qosymsha jarııalanady.
Aıta ketelik Astanada sholý dóńgeleginde órt shyqty.
