Astananyń bilim berý uıymdarynda 27 myńǵa jýyq pedagog jumys isteıdi
ASTANA. KAZINFORM - Búgingi tańda elordanyń bilim berý uıymdarynda 26 944 pedagog jumys isteıdi. Muǵalimder kúni qarsańynda vedomstvolyq nagradalarǵa salanyń 3500 úzdik mamany ıe boldy, dep habarlaıdy Astana ákimdiginiń resmı saıty.
Jańa 2024-2025 oqý jylynda Astananyń bilim berý uıymdaryna 2 262 pedagog qabyldandy, onyń ishinde 993-i jaıly mektepterge.
Muǵalimderdiń kásibı merekesi qarsańynda 3500 pedagog vedomstvolyq nagradalarmen marapattaldy.
Elorda pedagogteri mynadaı erekshe nagradalarmen marapattaldy: "Qazaqstannyń eńbek sińirgen ustazy" qurmetti ataǵy, "Qazaqstan Respýblıkasynyń Bilim berý isiniń qurmetti qyzmetkeri" tósbelgileri, "Astana qalasynyń qurmetti pedagogi" tósbelgileri, alǵys hattar men gramotalar. Bilim berý eńbeginiń ardagerleri de nazardan tys qalmady.
Bilim berý uıymdarynyń pedagogteri men basshylary tájirıbe almasý jáne kásibı quzyrettilikti arttyrý jónindegi halyqaralyq semınarlarǵa, konferentsııalarǵa qatysý úshin sheteldik issaparlarǵa barady. Sońǵy úsh jylda mundaı saparlarda 300-den astam adam boldy. Olar AQSh, Sıngapýr, Chehııa, Koreıa, Ózbekstan, Grýzııa, Japonııa, Túrkııaǵa bardy. Іssapar qorytyndysy boıynsha "Sheteldik taǵylymdama: kásiptik ádisnamany úırenińiz, meńgerińiz jáne damytyńyz" taqyryby boıynsha oqytý semınarlary uıymdastyryldy.
