Astananyń Baıqońyr aýdanynda jańa qoǵamdyq keńistik ashyldy
ASTANA. KAZINFORM — Elordanyń Baıqońyr aýdanyndaǵy Qoıandy saıajaı alqabynda jańa balalar oıyn alańy ashyldy. Bul týraly Astana qalasynyń ákimdigi málim etti.
Buryn bos turǵan aýmaq keshendi túrde abattandyrylyp, munda úlken fýtbol alańy, sporttyq trenajerlar men vorkaýt aımaǵy, balalar oıyn alańy jáne turǵyndar úshin demalys orny jasaqtaldy.
Bul keńistikti jergilikti turǵyndar kópten kútken edi. Endi balalar oıyn alańynda oınap, jastar sportpen shuǵyldanyp, al turǵyndar abattandyrylǵan aýmaqta serýendep, taza aýada demala alady.
Jańa qoǵamdyq keńistik turǵyndardyń belsendi demalysyna jáne salaýatty ómir saltyn ustanýyna qolaıly jaǵdaı qalyptastyrady.
Aýdan aýmaǵynda turǵyndarǵa qolaıly ári jaıly orta qalyptastyrý baǵytyndaǵy abattandyrý jumysy jalǵasyp jatyr.
Aıta keteıik, osyǵan deıin Memleket basshysy Qasym-Jomart Toqaev Astananyń qalalyq ınfraqurylymyn damytý, abattandyrý jáne kógaldandyrý baǵytyndaǵy júıeli jumysty jalǵastyrýdy tapsyrǵan bolatyn. Qazir elordanyń barlyq alty aýdanynda abattandyrý jumysy júrgizilip jatyr. Sońǵy jyldary Astanada 500-ge jýyq qoǵamdyq jáne aýla keńistigi abattandyryldy.
Aıta keteıik, Astanada qala aýmaǵyn keshendi kógaldandyrý jumystary jalǵasyp jatyr. Búginde elordada shamamen 4,7 mln jasyl jelek ósip tur. Al «Jasyl beldeý» aýmaǵynda taǵy 14 mln-ǵa jýyq ósimdik jaıqalyp keledi.
