Astananyń barlyq mektebinde Respýblıka kúnine arnalǵan synyp saǵattary ótti
ASTANA. KAZINFORM — 25 qazan — Respýblıka kúni qarsańynda Astananyń barlyq mektebinde oqýshylarǵa arnalǵan biryńǵaı synyp saǵattary uıymdastyryldy. Sabaqtarda el tarıhy, egemendiktiń mańyzy men ulttyq qundylyqtar týraly aıtyldy. Bul týraly Astana ákimdiginiń resmı saıty habarlady.
Osyndaı tárbıelik is-sharalardyń biri Qadyr Myrza Áli atyndaǵy BINOM SCHOOL mektep-lıtseıinde ótti. Synyp saǵattarynyń taqyryptary oqýshylardyń jas erekshelikterine qaraı tańdaldy. Bastaýysh synyptarda «Meniń Qazaqstanym», al 9-11-synyptarda «25 qazan — Respýblıka kúni» taqyryptary qamtyldy.
Tómengi synyp oqýshylary týǵan jer, Otan jáne memlekettik rámizder týraly bilimderin tolyqtyrdy. Al joǵary synyp oqýshylary Qazaqstannyń egemendikke qol jetkizý jolyn, táýelsizdiktiń tarıhı negizderi men eldiń damý kezeńderin talqylady.
Synyp saǵattary «Adal azamat» birtutas tárbıe baǵdarlamasy aıasynda uıymdastyryldy. Oqýshylar ınteraktıvti tapsyrmalar oryndap, tanymdyq suraqtarǵa jaýap berdi, shyǵarmashylyq jumystar men toptyq talqylaýlarǵa qatysty.
Іs-sharalardyń negizgi maqsaty — jas urpaqtyń boıynda otansúıgishtik qasıetterdi qalyptastyrý, el tarıhy men memlekettik rámizderge qurmetin arttyrý jáne Respýblıka kúniniń tarıhı mańyzyn túsindirý.
Sondaı-aq sabaqtarda oqýshylardyń azamattyq jaýapkershiligin nyǵaıtýǵa, ulttyq qundylyqtardy qurmetteýge jáne el bolashaǵyna degen qyzyǵýshylyǵyn arttyrýǵa erekshe kóńil bólindi.
Eske salaıyq, munyń aldynda Astanada Respýblıka kúni qalaı atap ótiletinin jazǵanbyz.
