Astananyń barlyq aýdanynda Belsendi uzaq ómir súrý ortalyqtary jumys isteıdi
ASTANA. KAZINFORM – Elorda ákimi Jeńis Qasymbek Instagram paraqshasynda zeınetkerlerge qandaı jaǵdaı jasalyp jatqany týraly jazdy, dep habarlaıdy elorda ákimdiginiń resmı saıty.
– Halyqaralyq qarttar kúni qarsańynda aǵa býyn ókilderimen kezdestim. Zeınet jasyndaǵy adamdardyń ómir súrý deńgeıin arttyrý jáne olardy qoǵamǵa belsendi jumyldyrý maqsatynda turaqty ári júıeli sharalar qabyldap kelemiz. Olardyń biri – «Belsendi uzaq ómir súrý ortalyqtaryn» ashý. Qazirgi ýaqytta qalada onyń 6 fılıaly bar. Olar elordanyń barlyq aýdanynda ornalasqan.
Belsendi uzaq ómir súrý ortalyqtarynda 20-ǵa jýyq túrli baǵyt boıynsha úıirmeler men sektsııalar jumys isteıdi. Munda jattyǵý zaldary, kompıýterlik synyptar, vokal jáne shyǵarmashylyqpen aınalysýǵa arnalǵan bólmeler bar. Sol sııaqty qazaq jáne aǵylshyn tilderin oqytý kýrstary, mádenı sharalar jáne t.b. paıdaly is-sharalar ótkiziledi, - dedi qala ákimi.
Sondaı-aq ol «Belsendi uzaq ómir súrý ortalyqtarynyń» artyqshylyǵy týraly jazdy.
– Aǵa býyn ókilderiniń qyzyǵýshylyqtaryna qaraı mynandaı klýbtar da ashylǵan: «Atadan balaǵa amanat», «Zııatkerlik oıyndar», «Kúmis dárejeli erikti», «Hor, vokal», «Baý-baqsha» jáne t.b. Máselen, Nura aýdanynda aldyn alý massajyna arnalǵan eki kabınet jumys isteıdi. Mundaı ortalyqtar qarııalardyń densaýlyǵyn nyǵaıtyp qana qoımaı, bos ýaqytyn paıdaly ótkizýge, pikirles dostar tabýǵa múmkindik beredi. Ortalyq qyzmeti – tegin.
Sizderdi kele jatqan Halyqaralyq qarttar kúni merekesimen shyn júrekten quttyqtaımyn! Denderińizge saýlyq, uzaq ǵumyr, baq-bereke tileımin, - dep jazdy Jeńis Qasymbek.
Eske salsaq, osyǵan deıin Qarttar úıiniń 101 jastaǵy turǵyny uzaq jasaýdyń syrymen bóliskenin jazǵan edik.