Astananyń ákimshilik aýdandarynyń shekarasy qalaı ózgeredi
ASTANA. KAZINFORM – Astana qalasynyń keıbir aýdandarynyń shekaralaryn ózgertý jáne belgileý, sondaı-aq osyǵan baılanysty ákimdik pen máslıhattyń buryn qabyldanǵan birlesken qaýlylary men sheshimderine ózgerister engizý týraly joba Qoǵamdyq keńestiń eskertýlerimen maquldandy.
Astana qalasynyń Sáýlet, qala qurylysy jáne jer qatynastary basqarmasy basshysynyń orynbasary Bahtııar Іlııasovtyń aıtýynsha, 2025 jyly qala shekarasyn belgileý boıynsha júrgizilgen jumystardyń qorytyndysy negizinde Astananyń naqty shekaralary men ákimshilik aýdandarynyń aýmaqtary naqtylanǵan.
Qalanyń jalpy aýmaǵy 79 733 gektardy qurady. Sonymen qatar ózen arnasy boıymen ótetin keıbir aýdandyq shekaralarda aýmaqtardyń naqty ózgerýi oryn alyp, ákimshilik aýdandardyń shekaralary men kólemi qaıta aıqyndaldy.
– Atalǵan naqtylaýlardy eskere otyryp, aýdandardyń aýmaqtary mynadaı bolyp belgilendi: Baıqońyr aýdany – 18 190 gektar, Saryarqa aýdany – 7 144 gektar, Almaty aýdany – 8 412 gektar, Esil aýdany – 20 518 gektar, Nura aýdany – 18 516 gektar, Saraıshyq aýdany – 6 953 gektar, – dedi ol.
Baıandamashynyń sózinshe, júrgizilgen jumystar nátıjesinde ár aýdannyń shekarasy men aýmaǵynda bolmashy ózgerister oryn alǵan. Usynylyp otyrǵan jobalar aýdandardyń naqty aýmaqtaryn qoldanystaǵy qujattarmen sáıkestendirý maqsatynda qabyldanady.
Otyrysqa qatysýshylar qujatty qosymsha pysyqtaý qajettigin kóterdi.
Atap aıtqanda, aýdan shekaralarynyń ózgerýi aldaǵy saılaý ýchaskeleriniń ornalasýy men bólinýine qalaı áser etetinine qatysty másele sóz boldy. Depýtattar aldaǵy saılaý naýqanynyń saıası mańyzyn eskere otyryp, atalǵan ózgerister boıynsha jan-jaqty taldaý júrgizýdi jáne tolyq esep usynýdy surady.
Talqylaý qorytyndysynda joba máslıhattyń tıisti eskertýleri men usynystaryn eskere otyryp qabyldandy.
Astanada sý jáne káriz ınfraqurylymyn jańǵyrtýǵa 20-ǵa jýyq joba iske asady.
