Astananyń 2024-2026 jyldarǵa arnalǵan bıýdjetine ózgeris engizý usynyldy
ASTANA. KAZINFORM – Elordanyń Qoǵamdyq keńesinde Astana qalasynyń 2024-2026 jyldarǵa arnalǵan bıýdjeti týraly qalalyq máslıhattyń 2023 jylǵy 14 jeltoqsandaǵy sheshimine ózgeris engizý máselesi talqylandy.
«Sizderdiń qaraýlaryńyzǵa Astana qalasynyń 2024-2026 jyldarǵa arnalǵan bıýdjetine engiziletin ózgerister berildi:
Menshik kiristeriniń túsimi boıynsha jospardy 24,1 mlrd teńgege ulǵaıtý usynylady. Onyń ishinde salyq túsimderi boıynsha jospardy 18 mlrd teńgege, salyqtyq jáne túsimder boıynsha naqty túsimder esebinen 5,3 mlrd teńgege jáne negizgi kapıtaldyq satýdyń túsimderi boıynsha 1,1 mlrd teńgege ulǵaıtý usynylyp otyr», - dedi óz baıandamasynda Astana qalasy Ekonomıka jáne bıýdjettik josparlaý basqarmasynyń basshysy Qaısar Mańqaraev.
Basqarma basshysy kiristerge súıene otyryp qala bıýdjetiniń shyǵys bóligi qalyptastyrylǵanyn aıtty. Sondaı-aq bıýdjet baǵdarlamalary ákimshileriniń qajettiligin atap shyqty.
«Sanıtarııa, abattandyrý, jaryqtandyrýdy qamtamasyz etýge 5 aýdanǵa 8 mlrd 516 mln teńge somasynda qarajat qarastyrylǵan. Onyń ishinde Almaty aýdany ákimi apparatyna 2,7 mlrd teńge, Baıqońyr aýdany ákimi apparatyna 996 mln teńge, Esil aýdany ákimi apparatyna 4 mlrd teńge, Nura aýdany ákimi apparatyna 600 mln teńge jáne Saryarqa aýdany ákimi apparatyna 70 mln teńge kóleminde qarajat qarastyryldy.
Kólik jáne jol kólik ınfraqurylymyn damytý basqarmasyna qosymsha 8 mlrd 675 mln teńge bólindi. Onyń ishinde jergilikti deńgeıde avtomobıl joldary jáne jolaýshylar kóligi salasynda memlekettik saıasatty iske asyrý jónindegi qyzmetterge 675 mln teńge, áleýmettik mańyzy bar ishki jolaýshylar tasymalyn sýbsıdııalaýǵa 8 mlrd teńge bólindi.
Energetıka basqarmasyna qosymsha 5 mlrd 603 mln teńge qarastyrylýda. Onyń ishinde jylý energetıkalyq júıesin damytýǵa 2 mlrd teńge, jylý maýsymyn úzdiksiz ótkizý úshin otyn satyp alýǵa, energııa óndirýshi uıymdardyń shyǵyndaryn sýbsıdııalaýǵa 3,5 mlrd teńge qarastyryldy.
Qurylys basqarmasyna qosymsha 2 mlrd 856 mln teńge bólindi. Onyń ishinde №13 orta mektep qosymsha qurylysyna 200 mln teńge, memlekettik organdardyń obektilerin damytýǵa 2,5 mlrd teńge bólindi.
Kommýnaldyq sharýashylyq basqarmasyna qosymsha 400 mln teńge bólindi. Onyń ishinde Astana sý arnasy atmosferalyq jerústi aǵyndaryn burýǵa jáne tazartýǵa 400 mln teńge qarastyryldy.
Qorshaǵan ortany qorǵaý jáne tabıǵatty paıdalaný basqarmasyna qosymsha 2 mlrd 973 mln teńge qarastyryldy. Onyń ishinde abattandyrýdy damytýǵa 2 mlrd 728 mln teńge jáne jarǵylyq kapıtaldy qalyptastyrý nemese ulǵaıtýǵa 245 mln teńge bólindi», - dedi Qaısar Mańqaraev.
Sondaı-aq spıker jergilikti atqarýshy organnyń basqa da basqarmalaryna qarastyrylǵan jáne bólingen qarjylardy aıta kele Astana qalasyna 2024 jylǵa naqtylanǵan bıýdjetiniń naqty kólemin atady.
«Engizilgen ózgeristerdi eskere otyryp, Astana qalasyna 2024 jylǵa naqtylanǵan bıýdjetiniń naqty kólemi 1 trln 327 mlrd 987 mln teńgeni quraıdy. Onyń ishinde menshikti kirister boıynsha túsimder 1 trln 12 mlrd teńge, transfertter men kredıtter 230 mlrd 759 mln teńge, memlekettik baǵaly qaǵazdar shyǵarý 54 mlrd 961 mln teńge jáne bos qaldyqtar 29 mlrd 83 mln teńge boldy», - dedi ol.
Usynysty Qoǵamdyq keńes músheleriniń talqylaýy kezinde baıandamashyǵa buǵan deıingi otyrysta aıtylǵan «Astana ormany» JShS-ǵa qosymsha qarjy bólý máselesine qatysty suraq qoıyldy. Qaısar Mańqaraev bul jobada atalǵan kompanııaǵa qosymsha 245 mln teńge bólý qarastyrylǵanyn aıtty.
Qoǵamdyq keńes músheleri óz kezeginde Dene shynyqtyrý jáne sport basqarmasynyń jyl sońynda qomaqty qarjyny qaıtarýyn synǵa aldy. Bıýdjet qarjysynyń ákimshilerine kelesi jyly bıýdjetten qarjy surarda onyń ıgerilýin de qatań josparlaý keregi eskertildi.
Qoǵamdyq keńes músheleri qala bıýdjetin ózgertýge engizilgen usynystardy kópshilik daýyspen qoldady.
Eske sala keteıik, qalalyq máslıhat elordanyń 2024-2026 jyldarǵa arnalǵan bıýdjetin bekitken. Onda Astananyń 2024 jylǵa josparlanǵan kiristeri 1 218 915 156,4 myń teńge dep kórsetilgen:
- salyqtyq túsimder boıynsha – 908 540 892 myń teńge;
- salyqtyq emes túsimder boıynsha – 63 140 464,4 myń teńge;
- negizgi kapıtaldy satýdan túsetin túsimder boıynsha – 13 889 913 myń teńge;
- transfertter túsimderi boıynsha – 233 343 887 myń teńge.