Astanany sýmen jáne jylýmen qamtamasyz etetin júıelerdiń jumysyna qaýip tónip tur — Prezıdent

ASTANA. KAZINFORM — Úkimet el ishindegi jáne sheteldegi kóshi-qon aǵymynyń esebin júrgizetin biryńǵaı tsıfrlyq júıe engizýge tıis. Bul týraly Prezıdent Qasym-Jomart Toqaev Qazaqstan halqyna Joldaýy barysynda aıtty. 

— Eńbek naryǵyn, ásirese kóshi-qon máselesin retteý salasynda esepke alýdyń ortalyqtandyrylǵan júıesi joq. Bul jaǵdaı osy saladaǵy boljaý jumysynyń sapasyna jáne sheshimderdiń tıimdiligine kesirin tıgizedi. Úkimet el ishindegi jáne sheteldegi kóshi-qon aǵymynyń esebin júrgizetin biryńǵaı tsıfrlyq júıe engizýge tıis. Іshki jáne syrtqy kóshi-qon úderisiniń baqylaýsyz qalýy jurttyń bári turǵysy keletin iri qalalarymyzdyń ınfraqurylymyna orasan salmaq túsirip otyr. Astana — sonyń aıqyn mysaly. Sońǵy úsh jyldyń ózinde elorda turǵyndarynyń sany 250 myńnan astam adamǵa, sonyń ishinde byltyr 100 myń adamǵa kóbeıdi. Bıylǵy ósim onsyz da joǵary sanalatyn osy kórsetkishten asyp túsýi múmkin. Elordada halyq sany resmı túrde 1,5 mıllıon adam bolǵanymen, onyń ınfraqurylymy is júzinde kún saıyn 1,9 mıllıon adamǵa qyzmet kórsetedi. Basqasha aıtsaq, Astana 400 myńnan astam adamǵa, ıaǵnı halyq sany boıynsha ortasha qala sanalatyn taǵy bir shahardyń turǵyndaryna para-par jurtqa eshqandaı joba-josparsyz qyzmet etip jatyr. Sondyqtan qalany sýmen jáne jylýmen qamtamasyz etetin júıelerdiń úzdiksiz jumysyna qaýip tónip tur, — dedi Qasym-Jomart Toqaev.

Prezıdenttiń aıtýynsha, Astanada 2022 jyldan beri muqtaj jandarǵa 7 myńǵa jýyq páter, sonyń ishinde kóp balaly otbasylarǵa 1380, jetim balalarǵa 835, erekshe qajettiligi bar adamdarǵa 665 páter berildi. 

Aıta ketelik Taldykóldiń mańyna qurylys júrgizýdiń shekti aýmaǵy belgilendi.