Astanalyqtarǵa velosıpedter syıǵa tartyldy
ASTANA. QazAqparat - Búgin Astanada EKSPO-2017 Halyqaralyq kórmesine arnalǵan velosherý ótti. Oǵan 1500 adam qatysty. Olardyń ishinde «Baldyrǵan» teýip júrgen eń jas veloshabandoz da bar, dep habarlaıdy QazAqparat tilshisi Astana ákimdiginiń baspasóz qyzmetine silteme jasap.
Velosherýge qatysqandar «Astana-Arena» stadıonynan bastap Qabanbaı batyr dańǵyly boıymen ótip, Qorǵaljyn tas joly men Turan dańǵylymen qaıtyp aınalyp keldi. Olar jalpy uzyndyǵy 10,5 shaqyrymdy júrip ótti. Márede eń jas jáne eń úlken qatysýshyǵa arnaıy syılyqtar tabystaldy. «Eń jas qatysýshy» ataǵyna bir jarym jasar Medına Ramazan ıe bolsa, eń úlkeni - Tagır Álpenov. Onyń jasy - 67-de. Olarǵa bas júlde - velosıpedter tabystaldy. Sondaı-aq barlyq veloshabandozdar arasynda lotereıa oınatyldy.
«Velosportpen aınalysyp júrgenime biraz ýaqyt boldy. Buǵan deıin talaı jarystarǵa da qatystym. Osy joly nemeremdi de alyp keldim. Sebebi salaýatty ómir saltyna bala kezinen bastap úıretý kerek», - deıdi jasy eń úlken veloshabandoz Tagır Álpenov.
Al eń jas veloshabandoz Medına Ramazannyń anasy - Gúljannyń aıtýynsha, Medına kishkentaı bolsa da óz «Baldyrǵanyn» tastamaı júredi. «Osyny biletin dostarymyz velosherý jaıynda aıyp, Medınany da alyp kelýge keńes bergen. Biz qýana-qýana kelistik», - deıdi Gúljan Ramazan.
