Astanalyqtarǵa usynys-shaǵym bildirýge bir apta berildi
ASTANA. QazAqparat - «Astana» kontsert zalynda (Kongress-Holl) 15 aqpanda ótýi tıis azamattardy qabyldaý sharasy uıymdastyrylmaıtyn boldy. Munyń ornyna, turǵyndar men kópbalaly analarǵa ózi turatyn aýdan ákimdikterine júginýge bir apta berilip otyr, dep habarlaıdy QazAqparat.
Astana ákimdiginen málim etkendeı, aýdan ákimdikteri 13-22 aqpan aralyǵynda qabyldaý ótkizetin bolady.
«Turǵyndardy tolǵandyratyn máselelerdiń kóptigin eskere kele, qala basshylyǵy 15 aqpanǵa belgilengen azamattardy qabyldaý sharasynynyń ornyna 7 kúnge sozylatyn «ashyq esik aptalyǵyn» ótkizýdi uıǵardy. Halyqqa qolaıly bolýy úshin azamattardy qabyldaý Almaty, Baıqońyr, Esil, Saryarqa aýdandarynyń ákimdikterinde quzyretti memlekettik organdardyń (Jumyspen qamtý jáne áleýmettik baǵdarlamalar, qoǵamdyq densaýlyq saqtaý, bilim jáne basqa da basqarmalar) qatysýymen ótetin bolady. Kópbalaly analardyń 6 aqpanda bergen aryzdarynyń barlyǵy júıelendirilip, taldaýdan ótkizildi. Qazirgi tańda atalmysh ótinishter boıynsha usynystar QR Úkimetiniń janynan qurylǵan azamattardyń kirisi men ómir súrý sapasyn arttyrý jónindegi sharalardy kúsheıtýmen aınalysatyn jumys tobynyń qaraýynda. Az qamtylǵan jáne kópbalaly otbasylarǵa qatysty máseleler jónindegi Memleket basshysynyń tapsyrmalaryn oryndaý aıasynda joldanǵan ótinishter boıynsha keshendi sharalar eki aıdyń kóleminde qolǵa alynatyn bolady dep kútilýde», - delingen ákimdik aqparatynda.
