Astanalyqtarǵa Toyota-nyń jańa úlgisi tanystyryldy
ASTANA. QazAqparat - Búgin Astanadaǵy «Astana Motors» ortalyǵynda «Toyota Camry 70»-tiń tanystyrylymy ótti, dep xabarlaıdy QazAqparat tilshisi.
Tyń dızaın, ergonomıka, erekshe ınterer, ınnovatsııalyq arhıtektýralyq platforma, basqarý men qaýipsizdiktiń jańa standarttary - bunyń barlyǵy jańa Camry 70-tiń artyqshylyqtary. Toyota-nyń ınjenerleri jobalaýdyń jańa ádisi - TNGA (Toyota New Global Architecture) jahandyq modýldik arhıtektýrany qoldandy. Sonyń nátıjesinde kólik júrgizý kezinde adam erekshe rahat alady. Sebebi kólik aerodınamıkasy jaqsara tústi, salonda syrttaǵy dybystar da estilmeıdi.
Jańa Camry 70 salony burynǵysynan ózgeshe. Osy joly múldem basqa tekstýralar men joǵary sapaly materıaldar qoldanyldy. Ázirshe, klıentterge Beige jáne Black tústeri usynylyp otyr. Sonymen qatar, Tiger Eye órnegimen árlengen salon da bar. Al shanaq boıaýynyń úsh túri usynylǵan. Olar - Midnight Emerald Blue (kók), Platinum White Pearl Metallic (sedep effektisi bar aq metallık) jáne Graphite Metallic (qaraqoshqyl metallık).
Kólikte úsh yńǵaıly dıspleı bar. Atap aıtqanda, 10 dıýımdi túrli-tústi proektsııalyq dıspleı, 7 dıýımdi kópfýnktsıonaldy aqparattyq dıspleı, ortalyq konsol ústinde ornalasqan Go navıgatsııasymen qamtamasyz etilgen 8 dıýımdi Toyota Touch® 2 mýltımedılyq júıesi. Toyota Touch® 2 Go júıesi 22 tilge aýdarylyp otyr. Wi-Fi tehnologııasy da bar. Sonyń arqasynda kólik ishinde onlaın qyzmetterge smartfon arqyly qosylýǵa múmkindik bar. Naqty kartografııalyq aqparatpen qamtamasyz etilgen navıgatsııalyq júıe qalalardyń úsh ólshemdi úlgilerin, joldaǵy jaǵdaıdy, apattyq qyzmetterdi shaqyrý múmkindikterin kórsetip otyrady.
Avtomobıldiń bastapqy baǵasy 8 970 000 teńgeden, al eń tanymal kólemi 2,5 l qozǵaltqyshty kóliktiń baǵasy 10 240 000 teńgeden bastalady.
Ortalyq dırektory Marat Smaǵulovtyń aıtýynsha, 2 lıtrlik komplektatsııany eshbir qıyndyqsyz alýǵa bolady. Al 2,5 lıtrlik Camry-ge aldyn ala tapsyrys berý kerek. Atalǵan kólikter mamyrdyń sońynda, ıa bolmasa, maýsymnyń basynda keledi.
«Búginnen bastap 2,5 lıtrlik Prestıj jáne Prestıj + kólikteriniń resmı satylymy bastalyp otyr. Buǵan deıin 2 lıtrlikti 9 adam satyp alyp ketti. Negizi, suranys joǵary. Klıentter kútemiz deıdi. Baǵasy da qymbat emes. Burynǵy kóliktermen salystyrǵanda, úsh-aq protsentke artyq. Bas kezinde 8 protsentke qymbat bolady degen. Qazir kúnde shamamen 5 tapsyrys túsedi», - dep atap kórsetti M.Smaǵulov jýrnalısterge bergen suxbatynda.
Aıta keteıik, «Camry 70»-tiń tanystyrylymy eki qalada - Astana me Almatyda qatar ótti.
