Astanalyqtarǵa tegin ekopaketter taratyldy
ASTANA. QazAqparat - Astana turǵyndaryna polıetılen paketterdiń ornyna qorshaǵan ortaǵa zııanyn tıgizbeıtin, ózdiginen ydyrap ketetin bıopaketter taratyldy. Ekologııalyq aktsııa Eurasian Resources Group bastamasymen elordanyń birneshe saýda jelisinde ótti, dep habarlaıdy QazAqparat.
Búgin, ıaǵnı Búkilálemdik qorshaǵan orta kúninde Astanadaǵy Galmart, KeńMart, Alma jáne SMALL saýda jelileriniń satyp alýshylary úshin erekshe shara uıymdastyryldy. Sýpermarketke saýda jasaýǵa kelgen dúken qonaqtaryna ádettegideı polıetılen paketter emes, ózdiginen ydyrap ketetin, qorshaǵan ortaǵa zııany joq ekopaketter taratyldy. Syrt kózge mundaı sómkeler kádimgi polıetılen paketten esh erekshelenbeıdi, esesine 2-5 jyl ishinde ydyrap ketedi.
«Jylyna álemde 500 mlrd polıetılen paket paıdalanylady. Mınýt saıyn shamamen bir mıllıondaı plastık bótelke satyp alamyz. Sońǵy 10 jyl ishinde paıdalanylǵan plastık kólemi sońǵy 100 jylda qoldanylǵan plastık aýqymynan kóp. Sondyqtan bizdiń top Astana turǵyndarynyń nazaryn osylaı aýdartyp otyr. Osy maqsatta arnaıy bıopaketter shyǵaryp, halyqqa tarattyq», - deıdi Eýrazııalyq toptyń (ERG) qorshaǵan ortany qorǵaý departamenti dırektory Talǵat Tórebekov. 
Satyp alýshylar úshin mundaı aktsııa kútpegen oqıǵa, al bıopaketter naǵyz jańalyq boldy.
«Qoldaný kerek eken, mundaı ekopaketti birinshi ret alyp turmyn. Tájirıbe jasap, pakettiń qansha ýaqytta ydyrap ketetinin anyqtap kóremin. Qyzyqtyrdy. Árıne, plastıkten bas tartý kerek», - dep pikirimen bólisti Astana turǵyny Elena Mıroshnıkova.
Dúkenniń keı qonaqtary ekologııalyq dúnıelerdi burynnan paıdalanatynyn aıtty, alaıda osy joly taratylǵan paketter olar úshin de jańa zat bolyp otyr eken.
«Bir kezderi qaǵaz paketter men toqyma sómkeler ustaıtynmyn, biraq keıin kádimgi plastıkke qaıta kóshtim. Aktsııa óte paıdaly jáne mańyzǵa ıe. Bolashaqta tek ekologııalyq taza jáne zııansyz komponentter qoldanýǵa tolyqtaı kóshý úshin, bul sharanyń qazaqstandyqtarǵa jaqsy oı salatynyna úmittimin», - deıdi dúken klıenti Dınara Ysqaqova. 
Eurasian Resources Group basshylyǵy kompanııanyń qorshaǵan ortany lastaýdy toqtatý úshin bar kúshin salyp jatqanyn aıtady.
«Ótken jyly Qazaqstan boıynsha tabıǵatty qorǵaý sharalaryna dep 20 mıllıardtan astam bólindi. Tazalaý súzgilerimizdi qorshaǵan ortaǵa barynsha az áser etý úshin ońtaılandyryp, sharalar qoldanyp jatyrmyz», - dep sózin qorytyndylady Talǵat Tórebekov.
Búkilálemdik qorshaǵan ortany qorǵaý kúni 1974 jyldan beri jyl saıyn BUU bastamasymen atap ótiledi. Osy jyly ol tabıǵatty plastıkpen lastaýǵa qarsy kúreske arnalyp otyr. Al Qazaqstan 2018 jyly qorshaǵan ortany qorǵaý salasyndaǵy qyzmetiniń 30 jyldyǵyn atap ótýde.
