Astanalyqtardyń jalaqysy ózge óńirlerge qaraǵanda 75 myń teńgege kóp
ASTANA. QazAqparat - Astanalyqtar respýblıkanyń basqa turǵyndaryna qaraǵanda ortasha eseppen 75 myń teńgege kóp jalaqy alady, dep habarlady QazAqparat Elorda ınfo saıtyna silteme jasap.
Ekonomıkanyń turaqty damýy turǵyndar tabysynyń 9,4 paıyzǵa ósýine septigin tıgizdi. 2018 jyldyń qańtar-maýsym aılarynda ortasha aılyq jalaqy mólsheri 232,5 myń teńgeni quraǵan. Bul týraly qalalyq qoǵamdyq tyńdaýlar barysynda elordanyń 2019-2021 jyldarǵa arnalǵan bıýdjetin qarastyrý kezinde Astana qalasy Strategııalyq jáne bıýdjettik josparlaý basqarmasynyń basshysy Rasýl Orazǵulov habarlady.
Aıta keteıik, Qazaqstan boıynsha ortasha aılyq jalaqy - 151,1 myń teńge.
2018 jyldyń ІІ toqsanynda jumyssyzdyq deńgeıi 4,5 paıyzdy quraǵan. Bul byltyrǵy jyldyń deńgeıimen birdeı bolyp otyr. Al Qazaqstan boıynsha bul kórsetkish 4,9 paıyzdy qurady. Aǵymdaǵy kezeńde 18 607 jańa jumys orny quryldy, sonyń ishinde shaǵyn jáne orta bızneste 14 082 jańa vakansııa paıda boldy.
