Astanalyqtardyń sýǵa qaryzy 1 mlrd teńgeden asty
NUR-SULTAN. QazAqparat – Nur-Sultan qalasynda sý tutynýshylardyń qaryzy 1 mlrd 120 mln teńgeni quraıdy. Bul týraly «Astana sý arnasy» mekemesi ekonomıkalyq josparlaý bóliminiń bas mamany Vıtalıı Artamonov málim etti, dep habarlaıdy QazAqparat tilshisi.
«Bıyl 8 aıdyń qorytyndysy boıynsha tutynýshylardyń sýǵa qaryzy 1 mlrd 120 mln teńgeni qurap otyr. Atalǵan somanyń 159 mln teńgesi jeke tulǵalardyń qaryzy. Qalǵan bereshek somasy zańdy tulǵalarǵa tıesili. Erekshe toqtalyp ótetin jaıt, elordada zańdy tulǵalar 963 mln teńge sýǵa qaryz. Sol somanyń 559 mln teńgesi neshe jyl buryn jabylyp qalǵan nemese bankrotqa ushyraǵan mekemelerge tıesili. ıAǵnı bereshek uıymdar qyzmetin áldeqaıda toqtatqan. Joq desek te bolady. Osy oraıda biz qalalyq ákimdikke qyzmeti toqtaǵan mekemelerdiń sýǵa bereshegin joıý kerektigin, ıaǵnı esepten shyǵarýdy usyndyq», - dedi Vıtalıı Artamonov BAQ ókilderine arnalǵan baspasóz týry barysynda.
Onyń aıtýynsha, qyzmeti toqtaǵan mekemelerdiń sýǵa bereshegi máselesi búginde qalalyq ákimdik deńgeıinde qaralyp jatyr.
Sondaı-aq, atalǵan mekeme ókili elordada jylyna 82 mln tekshe metr sý qoldanylatynyn aıtty.
Buǵan deıin habarlaǵanymyzdaı, búginde Nur-Sultan qalasynda 2,4 shaqyrymdy quraıtyn sý qubyry jóndelip jatyr.
