Astanalyqtardyń qansha paıyzy jeke klınıkaǵa qaralady
ASTANA. QazAqparat - Elorda turǵyndarynyń 20 paıyzdan astamy jekemenshik klınıkalarǵa qaralady. Bul týraly Astana qalalyq qoǵamdyq densaýlyq saqtaý basqarmasynyń basshysy Kamaljan Nádirov aıtty, dep habarlaıdy QazAqparat tilshisi.
«Búginde qalada 27 emhana bar, olarda elordalyqtar tirkelgen. Eger paıyzdyq ara salmaǵyn aıtar bolsaq, onda elorda turǵyndarynyń 20 paıyzy jeke klınıkada, al 80 paıyzy memlekettik emhanalarǵa tirkelgen. Halyqaralyq tájirıbe kórsetkendeı, bizde de medıtsınalyq qyzmet kórsetetin jeke klınıkalardyń sany artyp keledi. Ol úshin búginde barlyq jaǵdaı jasalǵan, tarıf bekitilgen, oıyn erejesi de naqty túzilgen. Biz mundaı memlekettik-jekeshelik áriptestiktiń damýyna qoldaý kórsetemiz», - dedi ol Dúnıejúzilik densaýlyq saqtaý uıymynyń alǵashqy medıtsınalyq-sanıtarlyq kómek jónindegi jahandyq konferentsııasy aıasynda BAQ ókilderine bergen suhbatynda.
Onyń paıymynsha, memlekettik-jekeshelik áriptestik medıtsınalyq qyzmetterdiń sapasy men qoljetimdiligi máselelerin sheshýge septigin tıgizedi.
«Bul bizge eń tómengi bıýdjet shyǵyndarymen medıtsınalyq kómek qoljetimdiligi jáne sapasy máselesin tez arada sheshýge múmkindik beredi. Qazirgi ýaqytta «úıdegi dáriger» baǵdarlamasyn júzege asyryp jatyrmyz. Ol Sizdiń úıińizden qadam jerde emdeý-ambýlatorlyq pýnktiniń bolýyn bildiredi», - dedi ol.
Aıta keteıik, keshe elordada Dúnıejúzilik densaýlyq saqtaý uıymynyń alǵashqy medıtsınalyq-sanıtarlyq kómek jónindegi jahandyq konferentsııasy bastaldy. Halyqaralyq jıyn qatysýshylaryna Elbasy Nursultan Nazarbaev vıdeojoldaý joldady.
Sondaı-aq elimizde týberkýlez dertinen jylyna qansha adam kóz jumatyny belgili boldy.
